РФнын Мамлекеттик Думасынын депутаты Михаил Матвеев мигранттардын бардык балдарын Орусиядан чыгарууну сунуштады.
Бул тууралуу ал өзүнүн Telegram каналына жазды.
Депутаттын айтымында, Орусия Федерациясында мигранттардын дээрлик 800 миң жашы жете элек балдары жашайт. Алардын 25 пайыздан азы бала бакчаларга жана билим берүү мекемелерине барышат.
Бул тууралуу ал Ички иштер министрлигинин статистикалык маалыматтарына таянып билдирди.
Михаил Матвеев өз алдынча калган чет элдик балдар көчөдө, коомдук жайларда орусиялык балдарга агрессия көрсөтүп жатканын айтат.
“Милиция бул балдарды тарбиялоодо ата-энелердин өз милдеттерин аткарбагандыгы үчүн жылына 8 миңге жакын гана билдирүүлөрдү беришерин мойнуна алышат. Бир нече жүз миңдеген балдардын жана алардын ата-энелери менен Россиядан депортациялоонун ордуна, Ички иштер министрлиги “адаптацияга жана интеграцияга багытталган иш-чаралардын комплекси”,- деп айтып жатат. Бул жерде кимдир-бирөөлөр эмне үчүн керек?”, – деп жазган Матвеев.
2024-жылы жашы жете элек мигранттар тарабынан жасалган оор кылмыштардын саны эки эсеге өскөн.
Буга чейин Мамлекеттик Думанын дагы бир депутаты Сергей Миронов Борбор Азия өлкөлөрү менен виза режимин киргизүүнү сунуштаган. Бул сунушка Орусиянын Тышкы иштер министрлиги каршы чыккан.
Эске сала кетсек, 2024-жылдын ноябрь айында Мамлекеттик дума мигранттардын балдарынын Орусияда мектепте билим алуусун кыйла татаалдаштырган. Ал тургай аны таптакыр жеткиликсиз кыла турган мыйзам долбоорун карап чыгышып, чет элдик балдарды орус тилин билүү сынагынан өткөндөн кийин гана мектепке киргизүүнү кабыл алышкан.
Натыйжада Орусияда чет элдик балдарды мектепке кабыл алуу боюнча жаңы талаптар күчүнө кирди.
Башкача айтканда, Орусияда 2025-жылдын 1-апрелинен тарта чет элдик жарандардын балдарын окуу жайларына кабыл алуу боюнча кошумча талаптар иштей баштады.
Бул тууралуу “POLITICS Central Asia” Telegram каналы билдирди.
Маалыматка караганда, негизги өзгөртүүлөр 6 жашка чыккан чет өлкөлүк балдар мамлекеттик каттоо процедурасынан өтүшү керек («грин карта» деп аталган). Мындан тышкары манжа изин милдеттүү түрдө алуу жана сүрөткө тартуу да каралган.
Ошол эле учурда ата-энелер же мыйзамдуу өкүлдөр баланын Орусияда калуу укугун тастыктаган документтердин көчүрмөлөрүн бериши керек. Бул жашоого уруксат, убактылуу жашоого уруксат, окуу визасы, миграциялык карта же башка расмий документтер болушу мүмкүн.
Ошол эле учурда орус тилинен тестирлөө. Чет элдик бала мектепке киргенде орус тилин билүү боюнча сынактан өтүшү керек.
Белгилей кетсек, көзөмөлгө алынган адамдардын реестрине киргизилген чет өлкөлүк жарандар балдарын билим берүү мекемелерине жөнөтө алышпайт.
Бул талаптарды бузуу юридикалык жактарга 500 миң рублга чейин айып салынышы мүмкүн.