Азербайжан Межилисинин депутаты Расим Мусабеков Бакудан Грозныйга учуп бара жаткан Азербайжан аба жолдорунун Embraer E190AR учагынын кыйрашына байланыштуу Орусия кечирим сурашы керектигин айтты.
Анын айтымында, учак Орусиянын аймагында, Грозныйдын асманында атып түшүрүлгөн жана муну тануу мүмкүн эмес. Мусабеков күнөөлүүлөр кылмыш жоопкерчилигине тартылып, компенсация төлөнүшү керектигин баса белгиледи. Болбосо өлкөлөр ортосундагы мамиле начарлап кетиши мүмкүн.
Депутат ошондой эле Орусияда массалык маалымат каражаттарында бул окуянын изин жаап-жашыруу аракеттери көрүлүп жатканын белгилеп, аны туура эмес деп эсептейт. Төрт жолу Азербайжан парламентине депутат болуп шайланган Мусабеков Эл аралык мамилелер жана парламенттер аралык байланыштар боюнча комитеттин, ошондой эле КМШ Парламенттер аралык ассамблеясынын делегациясынын мүчөсү. Ал ошондой эле Азербайжандын президентине караштуу Стратегиялык изилдөөлөр борбору тарабынан чыгарылган аналитикалык журналдын редакциялык кеңешинин мүчөсү.
буга чейин бир катар Telegram каналдары жана ЖМКлар учактын каптамасында (вшивка) кыйратуучу элементтердин же фрагменттердин издери болушу мүмкүн болгон зыянга көңүл бурушкан. Мындан улам айрымдар зениттик ракетанын соккусунан улам болушу мүмкүн деп божомолдошууда.
Ошол эле маалда Казакстандын Сенатынын төрагасы Маулен Ашимбаев учакка ракета тийип калышы ыктымалдыгы тууралуу кабарларды “божомол” деп атады.
Эске сала кетсек, Казакстандын Актау шаарындагы аэропортко “Azerbaycan Airlines” авиакомпаниясынын жүргүнчү учагы кулап түшкөн.
Өзгөчө кырдаалдар министрлигинин маалыматы боюнча, учакта 67 жүргүнчү жана беш экипаж мүчөсү болгон. Жабыркаган адамдардын арасында үч Кыргызстандын жараны болгон. Алардын экөөсүнүн жаракаты жеңил, бирөөсүнүкү оор экендиги тууралуу маалымат берилген.