2025-жылдын 5-апрелинде АКШнын бардык 50 штатында президент Дональд Трампка жана анын кеңешчиси Илон Маскка каршы митингдер жана жүрүштөр өттү. Демонстрациялар «Колуңарды тарткыла!» деген ураандын алдында бирикти. Митингдердин уюштуруучуларынын катарында профсоюздар, жарандык укуктарды коргоо уюмдары жана активисттер болгонун Медуза жазды.
Associated Press билдиргендей, митингдер тынч өттү, камоолор жөнүндө маалыматтар болгон жок. Трамп кайра президенттик кызматка келгенден кийин бир нече жолу нааразылык акциялары өткөн, бирок мындай кеңири масштабдагы демонстрациялар буга чейин болгон эмес.
CNN маалыматына ылайык, жалпы өлкө боюнча 1400гө жакын акция өткөн.
Палм-Бичте, Трамптын резиденциясына жакын жерде да жүздөгөн адамдар митингге чыгышты.
Ак үй билдиргендей, Трамп ишемби күнү гольф ойноо менен алек болгон жана «жекшембиде да ошондой пландары бар».
Нааразычылык жүрүштөр Манхэттендин борборунан тарта Аляскадагы Анкоридж шаарына чейин өлкөнүн бардык аймактарында өттү. Сиэтлде демонстранттар «Олигархияга каршы күрөш» деген жазуулар менен чыгышты.
Портленд, Орегон, жана Лос-Анджелесте көчө акциялары өттү.
Бостондо – «Колуңарды биздин демократиядан тарткыла», «Колуңарды социалдык камсыздоодон тарткыла»,
Лос-Анджелесте – «Билимден колуңарды тарткыла», «Каршылык көрсөт!» деген жазуулар менен жүрүштөр болду.
Митингчилер Трамп менен Масктын төмөнкү иш-аракеттерин сындашты:
– федералдык кызматкерлерди массалык түрдө кыскартуу,
– мигранттарды депортациялоо,
– трансгендерлердин укуктарына коркунуч жараткан саясат,
– саламаттык сактоо жана социалдык программаларга бөлүнгөн каражаттарды кыскартуу.
Протестчилер Трампты 2-апрелде киргизген жаңы тарифтерди жокко чыгарууга чакырышты. Бир плакатта Инд океанындагы Херд жана Макдональд аралдарына да бажы төлөмдөрү салынганы көрсөтүлүп, мунун абсурддугу белгиленген — анткени бул аралдарда негизинен пингвиндер жашайт.
Вашингтондо митингге Демократтар партиясынын айрым конгрессмендери катышып, эл алдына чыгышты.
Жами Раскин, өкүлдөр палатасынын мүчөсү:
«Биздин негиздөөчүлөр Конституцияны “Биз, эл” деген сөздөр менен жазышкан, “Биз, диктаторлор” деп эмес», — деди ал.
Human Rights Campaign уюмунун башчысы Келли Робинсон да сөз сүйлөп, АКШнын ЛГБТ жамаатына карата саясатын кескин сынга алды:
«Бул чабуулдар – жөн гана саясат эмес. Бул жеке мүнөздөгү чабуулдар. Алар биздин китептерибизди тыюуга аракет кылышууда, ВИЧтин алдын алуу боюнча каржылоону кыскартышууда, дарыгерлерибизди, мугалимдерибизди, үй-бүлөлөрүбүздү жана жашообузду кылмыштуулукка түртүшүүдө. Биз мындай Американы каалабайбыз. Биз бардык адамдар үчүн кадыр-барк, коопсуздук жана эркиндик болгон Американы каалайбыз», — деген анын сөзүн Associated Press келтирет.