АКШнын президенти Дональд Трамп Владимир Зеленский ресурстук келишимден баш тарткысы келип жатканын билдирди.

“Украинанын президенти Зеленский кен иштетүү келишиминен баш тарткысы келет. ”, -деп билдирди АКШнын президенти Дональд Трамп журналисттерге.

Бул маалыматты Reuters агенттиги жазды.

“Ал сейрек кездешүүчү жерлер боюнча келишимден чыгууга аракет кылып жатат, эгер андай кылса, ал кыйынчылыкка, чоң кыйынчылыкка дуушар болот”,- деди Трамп.

Буга чейин Жогорку Раданын депутаты Ярослав Железняк АКШ сунуштаган Украинанын ресурстары боюнча жаңы келишимдин долбоору Украинанын пайдасына эмес деп билдирген.

Анын айтымында, документ АКШнын бардык кен байлыктарын, анын ичинде мунай менен газды башкарууга катышуусун болжолдойт жана Украина үчүн коопсуздук кепилдиктери тууралуу бир ооз сөз айтылбайт.

Өз кезегинде Владимир Зеленский АКШны келишимдин шарттарын өзгөрттү деп айыптады. Ал ошондой эле Вашингтон тарабынан мурда берилген жардамды карыз катары таануудан баш тартты.

28-февралда Ак үйдө Украинанын кен байлыктарын биргелешип иштетүү боюнча келишимге кол коюуга келгенде Трамп менен Зеленскийдин ортосунда пикир келишпестик жаралган.

Ал эми 11-марттагы сүйлөшүүлөрдөн кийин Зеленскийдин сайтында жарыяланган расмий коммюникеде АКШ менен Украина Украинанын кен байлыктарын иштетүү боюнча ар тараптуу келишим түзүүнү макулдашканы айтылган.