Алжир Сирияны бөлүп-жаруу же анын аймагынын бир бөлүгүн башка өлкөлөргө кошууга багытталган бардык аракеттерге каршы.
Бул тууралуу Алжирдин Бириккен Улуттардын Уюмундагы туруктуу өкүлү Аммар бин Жамме Сирия боюнча Коопсуздук кеңешинин жыйынында билдиргенин “Eurasia Today” агенттиги маалымдайт.
Аммар бин Жамме жыйында Сириянын бүтүндүгүн сактоо зарылдыгына басым жасап, жаңжалды токтотуу жана Израил аскерлеринин өлкө аймагындагы операциясын токтотуу боюнча 1974-жылкы келишимди сактоого чакырды.
Ал ошондой эле сириялык качкындардын кайтып келиши үчүн ылайыктуу шарттарды түзүү, анын ичинде Сириядагы коопсуздук абалын жакшыртуу жана негизги кызматтарды көрсөтүү зарылдыгын белгиледи.
Египеттин БУУдагы туруктуу өкүлү Усама Абдул Халик да жыйында Коопсуздук Кеңешин Израилдин Сирияга каршы агрессиясын токтотуу жана өлкөнүн аймагында чет элдик күчтөрдүн болушун токтотуу үчүн чара көрүүгө чакырды.
Ал качкындардын өз ыктыяры менен кайтып келишин баштоо үчүн Сирия элине жардам берүү жана өлкөнү кайра курууга көмөктөшүү зарылдыгын белгиледи.
Ал эми БУУнун Сирия боюнча атайын өкүлү Гейр Педерсен Сириядагы убактылуу бийликтердин көзөмөлүнөн тышкары маанилүү аймактар бар экенин, жаңжал уланып жатканын, ошондой эле Сириянын эгемендигине, биримдигине жана аймактык бүтүндүгүнө реалдуу коркунучтар бар экенин белгиледи.
Сирия Араб Республикасынын туруктуу өкүлү Куссей Алдаххак өз кезегинде эл аралык коомчулукту сириялыктарды жана алардын мамлекетин өлкөсү үчүн жакшы келечекти куруу аракетинде колдоого чакырды.
Анын айтымында, де-факто бийликтер Сириянын көз карандысыздыгын, эгемендүүлүгүн, биримдигин жана аймактык бүтүндүгүн сактап калууга умтулат.
Ал учурда өлкө келечектеги пландарды жана өткөөл өкмөттү түзүү маселесин талкуулоо үчүн улуттук диалог конференциясын өткөрүүгө даярданып жатканын ырастады.
27-ноябрда Сириядагы куралдуу оппозиция өкмөттүк армиянын Алеппо жана Идлиб провинцияларындагы турумдарына каршы кеңири масштабдагы чабуулун баштаган. 7-декабрдын кечинде алар Алеппо, Хама, Дараа жана Хомсту басып алып, 8-декабрда Сириянын өкмөттүк күчтөрүнүн бөлүктөрү таштап кеткен Дамаскка киришкен. Башар Асад Сириянын президенттигинен баш тартып, өлкөдөн чыгып кеткен.
2024-жылдын январь айынан бери Идлиб провинциясында оппозиция тарабынан түзүлгөн Куткаруу өкмөтү деп аталган өкмөттү жетектеп келген Мохаммед аль-Башир 10-декабрда 2025-жылдын 1-мартына чейин созула турган өткөөл мезгилге Сирия өкмөтүнүн башчысы болуп дайындалганын жарыялаган.