Бир нече араб жана ислам өлкөлөрү АКШнын Израилдеги элчиси Майк Хакабинин Израилдин Жакынкы Чыгыш аймагындагы жерлерге доомат коюшу тууралуу билдирүүсүнө кескин реакция кылышты, деп билдирди РИА Новости агенттиги.
Басылманын маалыматына ылайык, АКШнын Израилдеги элчиси Майк Хакаби журналист Такер Карлсонго берген маегинде Израил Жакынкы Чыгыштын дээрлик бүт аймагына «библиялык» укукка ээ экенин айткан. Анын айтымында, бул аймакка азыркы Иордания, Сирия, Ливан, ошондой эле Сауд Арабиясынын жана Ирактын айрым бөлүктөрү кирет.
Бул билдирүүнү 14 араб жана ислам өлкөсү, ошондой эле Ислам кызматташтык уюму (ИКУ), Араб мамлекеттеринин лигасы (АМЛ) жана Перс булуңундагы араб мамлекеттеринин кызматташтык кеңеши (ПБАМКК) айыпташты. Алар биргелешкен билдирүү таратышты.
«Бириккен Араб Эмираттарынын, Египеттин, Иорданиянын, Индонезиянын, Пакистандын, Түркиянын, Сауд Арабиясынын, Катардын, Кувейттин, Омандын, Бахрейндин, Ливандын, Сириянын жана Палестинанын тышкы иштер министрликтери, ошондой эле ИКУ, АМЛ жана ПБАМКК катчылыктары АКШнын Израилдеги элчисинин Израилге араб мамлекеттерине таандык аймактарды, анын ичинде оккупацияланган Батыш Жээкти көзөмөлдөөгө болот деген билдирүүлөрүн катуу айыптап, терең тынчсыздануусун билдиришет», — деп айтылат БАЭнин ТИМинин билдирүүсүндө.
БАЭнин Тышкы иштер министрлиги билдирүү тараткан өлкөлөр «эл аралык укуктун принциптерин жана Бириккен Улуттар Уюмунун Уставынын нормаларын одоно бузган, аймактын коопсуздугуна жана туруктуулугуна олуттуу коркунуч жараткан мындай кооптуу жана чагымчыл билдирүүлөрдү кескин түрдө четке кагарын» ырасташканын маалымдады.
Биргелешкен билдирүүдө ошондой эле АКШнын Израилдеги элчисинин сөздөрү АКШнын президенти Дональд Трамптын көз карашына, ошондой эле Газадагы жаңжалды токтотуу боюнча Комплекстүү планга түздөн-түз каршы келери белгиленет. Ал план кырдаалды курчутпоого жана палестин элине өз алдынча көз карандысыз мамлекет түзүүгө кепилдик бере турган кеңири саясий жөнгө салууга негиз түзүүгө багытталган.
«(Трамптын — ред.) планы сабырдуулукту жана тынч бирге жашоону илгерилетүүгө негизделген. Ал эми башка өлкөлөрдүн жерлерин көзөмөлдөөнү мыйзамдаштырууга багытталган билдирүүлөр бул максаттарды бузуп, чыңалууну күчөтөт жана тынчтыкка өбөлгө түзүүнүн ордуна чагымчылык болуп саналат», — деп билдиришти БАЭнин ТИМинде.
Араб жана ислам өлкөлөрүнүн тышкы иштер министрликтери Израил оккупацияланган палестин аймагына жана башка басып алынган араб жерлерине эч кандай суверенитетке ээ эмес экенин дагы бир жолу ырастап, Батыш Жээкти аннексиялоого же аны Газа секторунан бөлүп кароого багытталган бардык аракеттерди кабыл албай турганын жана Израилдин конуштарды кеңейтүү саясатына чечкиндүү түрдө каршы экенин билдиришти.