Сириянын президенти Башар Асад Сирияда террордук топтордун активдешүүсүнүн фонунда Ирандын президенти Масуд Пезешкян менен телефон аркылуу сүйлөшүп, аны менен мамлекеттердин терроризмге каршы күрөшүүдөгү кызматташтыгын талкуулады, деп билдирди Сирия лидеринин канцеляриясы.
Буга чейин Асад Ирандын тышкы иштер министри Аббас Аракчи менен Дамаскта жолугушкан.
Маалыматка караганда, Башар Асад Ирандын президенти Масуд Пезешкян менен Сириядагы акыркы окуяларды жана терроризмге каршы күрөшүүдөгү эки өлкөнүн кызматташтыгын талкуулады.
Телефондук сүйлөшүүдө Асад террорчулардын учурдагы эскалациясы аймакты бөлүп-жарып, анын өлкөлөрүн майдалап, Америка менен Батыштын кызыкчылыктарына жана максаттарына ылайык карталарды кайра сызуу аракетиндеги узак мөөнөттүү максаттарды чагылдырарын билдирди.
Сириянын лидери террордук топтордун активдешүүсү Сирияга өлкөдө терроризмдин тамыры жок кылынмайынча аларга каршы турууга чечкиндүүлүктү гана берерин баса белгиледи.
Өз кезегинде Пезешкян Иран террорчулукка каршы күрөштө Сирияга бардык колдоо көрсөтүүгө даяр экенин ырастады.
“Хаят Тахрир аш-Шам” (мурдагы Жабхат ан-Нусра) террордук тобу Сириянын куралдуу оппозициясы деп аталган бир катар куралдуу түзүмдөр менен биргеликте 29-ноябрда Идлибдин түндүгүнгөн Алеппо жана Хама шаарларын көздөй жылып, масштабдуу операция баштаган. Бир күндөн кийин, 30-ноябрда Сириянын экинчи чоң шаары жана анын айланасы, анын ичинде эл аралык аэропорт жана Кувейрис аскердик аэродрому террористтердин көзөмөлүнө өткөн.
Алеппонун согушкерлер тарабынан толук алынышы Сирияда 2011-жылы кризис башталгандан бери биринчи жолу болду. 2016-жылдын аягына чейин куралдуу оппозиция шаардын чыгыш бөлүгүн гана көзөмөлдөп, Орусиянын Аэрокосмикалык күчтөрүнүн колдоосу менен Сирия армиясы тарабынан сүрүлүп чыгарылган.
Алеппо алынгандан кийин террордук топтор Маарет Нууман айылын басып алып, Хама шаарын көздөй жылууга аракет кылышкан. Алеппо провинциясынын түндүгүндө, Тель-Рифаат конушунун аймагында күрт күчтөрү көзөмөлдөгөн аймактарга тереңирээк кирүүгө аракеттер көрүлүүдө.
Сирия армиясынын командачылыгы өз кезегинде 1-декабрда Хамада террорчулардын илгерилеши токтотулуп, өкмөттүк аскерлер каршы чабуулга өтүп, мурда террористтер басып алган бир катар калктуу конуштарды бошотконун жарыялады.