Немис бийликтери Израилге жаңы курал-жарактарды жеткирүүгө бөгөт коюп, аларды карапайым элге каршы колдонушу мүмкүн деп жазат Politico өз булактарына таянуу менен.
Германияда курал-жарак экспорту жогорку бийлик өкүлдөрүнөн турган Федералдык Коопсуздук Кеңеши тарабынан жөнгө салынат. Израилге курал-жарак экспорттоо маселесин талкуулоо учурунда Германиянын вице-канцлери Роберт Хабек менен тышкы иштер министри Анналена Бербок бул өлкөгө курал-жарак жөнөтүүгө уруксат берүүдөн баш тартууну чечишти. Алар Германиянын курал-жарактары жарандарга каршы колдонулбайт деп Израилден кепилдик алууну талап кылып жатышат.
«Израилге курал-жарак жеткирүү эл аралык гуманитардык укуктун сакталышы менен байланыштуу. Мындай талаптар келип чыгууда, анткени бул милдеттенмелер аткарылбаса, Германиянын административдик соту кандайдыр бир курал-жаракты өткөрүп берүүгө тыюу салышы мүмкүн», – деди Politicoнун булагы.
Буга чейин Германияга каршы Израилге курал экспорттоону токтотуу боюнча бир нече доо арыздар берилген, алар жарандык буталарга кол салуу үчүн мындай куралды колдонууга тыюу салган мыйзамды бузду деп айыпталган.
Расмий маалыматтар боюнча, 2023-жылдын башынан 21-августка чейин Германия Израилге 14,5 миллион евро өлчөмүндө курал-жарак экспорттоого уруксат берген. Бирок, бул сумманын 2%ы гана согуштук системаларды түзөт. Калгандарына каска жана соот сыяктуу өлүмгө алып келбеген жабдуулар кирет.
