«Чек арасыз репортёрлор» дүйнө жүзүндөгү ЖМК кызматкерлерине жасалган кол салуулар боюнча доклад жарыялады.
Анда 2025-жылы Израиль Газа секторундагы геноциддин шартында дүйнөдө эң көп журналист өлтүрүлгөн мамлекет катары кайрадан биринчи орунга чыкты. Бул тууралуу «Чек арасыз репортёрлор» (RSF) уюмунун быйылкы жылдагы ЖМК кызматкерлерине каршы кол салуулар тууралуу докладында айтылат.
Докладга ылайык, 2025-жылы дүйнөнүн ар кайсы өлкөлөрүндө 67 журналист курман болгон, алардын жарымына Израиль түздөн-түз жооптуу.
Израилдин Газа секторуна каршы кол салууларынын натыйжасында 29 палестиналык журналист өлтүрүлдү. Бул дүйнөдө бир жыл ичинде набыт болгон журналисттердин 43% Израилдин чабуулдарынын курмандыгы болгонун билдирет.
Докладда Израиль быйыл да журналисттер эң көп өлтүрүлгөн өлкө катары тарыхка киргени белгиленет. 2023-жылдын октябрынан тартып Израилдин Газага чабуулдарынан 220дөн ашык ЖМК кызматкери набыт болгону көрсөтүлгөн.
Авторлор Израилди «журналисттердин эң начар душманы» деп аташат. Акыркы үч жылда Израиль журналисттер эң көп өлтүрүлгөн мамлекет бойдон калууда. Ошондой эле Израилдин түрмөлөрүндө 20 палестиналык журналист камакта экени белгиленет.
Докладда Мексикадагы кылмыштуу топтор журналисттерге каршы кол салууларды көбөйткөнүн да баса белгилейт.
Мексика — быйыл 9 журналисттин өлүмү катталып, дүйнөдөгү журналисттер үчүн экинчи эң кооптуу өлкө деп аталган.
Судан — армия менен Тез реакция күчтөрүнүн (TRK) ортосундагы кагылышуулар күчөп жаткан өлкөдө быйыл 4 журналист өлтүрүлгөн, алардын экөө TRK жоокерлери тарабынан уурдалып, кийин өлтүрүлгөнү айтылат.