Израилдин Башкы прокуратурасы премьер-министр Биньямин Нетаньяхунун сот ишинде эки жумага тыныгуу берүү өтүнүчүнө каршы экенин билдирди. Алар мунун себеби катары сот процесси буга чейин эле жай жүрүп жатканын жана алдыда жайкы эс алуу маалы турганын айтышты.
The Times of Israel маалыматына ылайык, Нетаньяхунун адвокаты Амит Хадад премьер-министрге Иран менен болгон акыркы согуштан кийин «дипломатиялык, улуттук жана коопсуздук боюнча маанилүү маселелерге» убакыт бөлүү үчүн эки жума тыныгуу керек болгонун айтты.
Хададдын айтымында, бул маселелерге Газадагы согушту башкаруу жана туткундарды бошотуу маселеси кирет.
Башкы прокуратура өз жообунда мындай жалпы жүйөлөр эки жумалык угуу процессин токтотууга негиз боло албай турганын белгиледи, айрыкча бул жайкы тыныгуу алдында болуп жатканын эске алып.
Документте белгиленгендей, буга чейин эле Нетаньяхунун милдеттерин эске алуу менен өзгөртүүлөр киргизилген — ал сотко апта сайын үч жолу эмес, эки жолу келүүгө уруксат алган.
«Ошондуктан айыптоочу тарап бул өтүнүчкө каршы», — деп айтылат билдирүүдө.
Эми Иерусалимдеги райондук сот бул маселе боюнча чечим кабыл алышы керек.
Эки жумалык тыныгуу өтүнүчү АКШ президенти Дональд Трамп премьер-министрге каршы жүрүп жаткан сот процесси тууралуу «Израилдеги согуш маалындагы улуу премьер-министрге каршы аңчылык уланды» деп билдиргенден бир нече сааттан кийин берилген.
Нетаньяхуга карата үч башка коррупция иши боюнча айып тагылган — пара алуу, алдамчылык жана ишенимди кыянаттык менен пайдалануу. Ал өзүнө коюлган айыптарды четке кагып, мунун бардыгы полиция жана башкы прокуратура тарабынан уюштурулган саясий төңкөрүштүн бир бөлүгү экенин билдирип келет.