Ирандагы сириялык СДСке ыктаган күрт топтору — РПКнын бир тармагына кирген ирандык PJAK уюму жана дагы 6 башка ирандык күрт солчул-секулярдык партиялар Ирандын күрттөр жашаган аймактарындагы нааразылык акцияларын куралдуу көтөрүлүшкө айлантууга аракет кылып жатышат. Алар буга чейин биргелешкен билдирүү жасап, башаламандыктарга чакырык ташташкан.
Нааразылыктар башталгандан кийин күрт куралдуу топтору чек арага жакын райондордон өз жоочуларын Ирандын ички шаарларына өткөрө башташкан.
Бүгүн Иран Ислам революциясынын сакчылар корпусунун (КСИР) атайын багыттагы бөлүктөрү Керманшах шаарында күрт сепаратисттери менен кагылышууга киришти. Middle East Spectator басылмасынын маалыматына ылайык, бул кагылышууда эки аскер кызматкери жана кеминде жети күрт жоочусу каза болгон.
АКШ менен Израиль Ирандагы күрт топторун буга чейин даяр турган куралдуу түзүмдөр катары карап, айрым шаарлардагы нааразылык акцияларын куралдуу көтөрүлүшкө айланта алат деп эсептеп жатышат. Ошондой эле бул кырдаал тартип сактоо органдарын катуу басуу ыкмаларын колдонууга түртүп, кийинчерээк тышкы кийлигишүү үчүн шылтоо катары пайдаланылышы мүмкүн.