Ирандын Аскердик-деңиз күчтөрүнүн (АДК) тик учагы Оман булуңунда АКШнын “USS Fitzgerald” аттуу аскердик кемесин тосуп, эскертүү сигналдарын берип, натыйжада кемени түштүк тарапка курсун өзгөртүүгө мажбур кылды.
Ирандык аскерлердин билдирүүсүнө ылайык, АКШнын аскердик кемеси Иран көзөмөлдөгөн суулардын жанына жакындаган. Мунун негизинде Ирандын АДКнын Үчүнчү округуна караштуу ыкчам аракеттенүүчү тик учак жиберилген.
Тик учак эсминецтин үстүнөн калкып, радиобайланыш аркылуу Иран көзөмөлдөгөн аймактардан алыс болуу тууралуу так эскертүү бергенин Press TV маалымдады.
Андан кийин чыккан чыңалууда АКШнын “Фицджеральд” кемесинин экипажы эгер тик учак аймактан кетпесе, ок атууга даяр экенин эскерткен.
Мындай коркутууга жооп катары Иран армиясынын абадан коргонуу күчтөрүнүн командачылыгы ишке кирип, тик учак абадан коргонуу күчтөрүнүн толук коргоосунда экенин билдирип, АКШ кемесине дароо курсун өзгөртүү буйругун берген.
Иран тараптын маалыматына ылайык, АКШнын “Фицджеральд” кемеси буйрукка баш ийип, талаштуу аймактан түштүккө кетүүгө мажбур болгон.
Бул окуя боюнча АКШнын Куралдуу күчтөрү расмий билдирүү жасай элек. Окуя АКШ менен Израилдин Иранга каршы акыркы согушунан кийин Перс булуңунда күчөгөн чыңалуунун фонунда орун алды.
Иран менен АКШнын Аскердик-деңиз күчтөрүнүн Перс булуңунда, Оман булуңунда жана Ормуз кысыгында 1980-жылдардан бери уланып келген тирешүүлөрү бар.
Эске салсак, 2019-жылы Иран АКШнын RQ-4A Global Hawk аттуу учкучсуз дронун Ормуз кысыгынын жанында атып түшүргөн, аны аба мейкиндигин бузду деп айыптаган.
Ирандын Аскердик-деңиз күчтөрү маалымат каражаттарында чет элдик державаларды тыйып турууга даяр экенин көрсөтүү максатында Перс жана Оман булуңдарында ири масштабдагы аскердик машыгууларды байма-бай өткөрүп турат.