Ислам революциясынын жогорку лидери аятолла Али Хаменеи өзүнүн сөзүндө Ирандагы Ислам революциясы Батыш дүйнөсүн таң калтырганын билдирди. Бул билдирүү анын урматтуу Имам Хомейнинин дүйнөдөн кайткандыгынын 36 жылдыгына арналган аземде айтылды.
«Эч ким бул революция жана бул Имам америкалыктарды жана сионисттерди, көп жылдар бою Иранды толук көзөмөлдөп келген күчтөрдү, өлкөдөн сүрүп чыгарат деп ойлогон эмес», — деди ал.
Аятолла Хаменеи Ирандын саясий түзүмү өсүп, туруктуулукка жана кубаттуулукка жетишип жатканын, мунун баары улуу революциянын натыйжасы экенин баса белгиледи.
«Өкмөттөр билиши керек: сионисттик режимге таянуу эч бир өлкөгө коопсуздук алып келбейт. Бул режим кыйроо жолунда жана эгер Аллах кааласа, көпкө чейин жашабайт», — деп кошумчалады Хаменеи.
Анын айтымында, улуттук көз карандысыздык — бул мамлекет Америка же ага окшогон өлкөлөрдүн “жашыл же кызыл жарыгын” күтпөй иш алып барарын билдирет. Улуттук көз карандысыздыктын негизги принциптеринин бири — “Биз кыла алабыз” деген ишеним.
Ирандын жогорку лидери белгилегендей, Американын негизги талабы — Иран өз алдынча ядролук өнөр жайды өнүктүрбөй, натыйжада АКШга көз каранды болууга аргасыз болушу.
«АКШнын бул куру сөзүнө биздин жообубуз белгилүү: алар бул маселе боюнча таптакыр эч нерсе кыла алышпайт. Иран уран байытуу менен алектенеби же жокпу — силерге эмне тиешеси бар? Бул силердин ишиңер эмес! Силер кимсиңер, бизге көрсөтмө берүү үчүн?!», — деп жыйынтыктады аятолла Хаменеи.