Ирандын тышкы иштер министри Сейед Аббас Аракчи Афганистан менен Пакистан ортосундагы аскердик чыңалуунун күчөшүнө байланыштуу эки өлкөнү диалогго жана сабырдуулукка чакырып, маселелерди сүйлөшүү аркылуу чечүүгө үндөдү.
«Ыйык Рамазан айында, ислам дүйнөсүндө сабырдуулуктун жана тилектештикти бекемдөөнүн айы Афганистан менен Пакистан ортодогу пикир келишпестиктерди коңшулук мамиленин негизинде диалог жолу менен жөнгө салышы керек», — деп Аракчи X социалдык тармагындагы баракчасына урду жана фарсы тилдеринде жазды.
Ал Иран эки өлкөнүн ортосундагы диалогго, өз ара түшүнүшүүнү жана кызматташтыкты бекемдөөгө көмөк көрсөтүүгө даяр экенин кошумчалады.
Пакистан-Афганистан чек арасындагы кырдаалдын курчушу
Өткөн аптада Пакистан Афганистандын бир нече провинцияларындагы райондорго абадан сокку урган. Талибандын маалыматы боюнча, ондогон жайкын тургундар каза болуп, жаракат алышкан.
26-февралда Пакистан менен Афганистандын чек арасында кайрадан кагылышуулар болду. Афганистандын Коргоо министрлиги Пакистандын аба соккуларына жооп катары аскердик операция жүргүзүп жатканын жарыялады. Афган күчтөрү өлкөнү бөлүп турган Дюранд сызыгындагы Пакистан күчтөрүнүн борборлоруна жана объектилерине каршы ири масштабдуу чабуул жасады.
Афганистан менен Пакистандын чек арасындагы 2611 чакырым ооган тарап расмий тааныбаган Дюранд сызыгы деп аталат.
Исламабад өз кезегинде Афганистандын Кабул, Кандагар жана Пактия провинцияларына сокку урган. Пакистандын коргоо министри Хаважа Асиф Афганистанга ачык согуш жарыялап, аны терроризмди экспорттоп жатат деп айыптаганын Dawn гезити маалымдады.
Афган тарап жоготууларга учураганын билдирди: сегиз жоокер каза болуп, 13ү жаракат алды. Мындан тышкары, Нангархардагы качкындар лагерине ракеталык чабуулдардын натыйжасында 13 афган жараны, анын ичинде аялдар жана балдар жаракат алышкан.
Эки өлкөнүн ортосундагы мамилелер өткөн жылдын октябрь айында начарлаган. Андан кийин Пакистанда бир катар террордук чабуулдар болуп, Исламабад муну “Техрик-е Талибан Пакистан” радикалдык уюмуна байланыштырган. Кабул бул радикалдык топтун согушкерлери Афганистанда жайгашканын четке кагып, аларга каршы күрөшүүнү коңшу өлкөнүн ички маселеси деп атаган. Бир жума бою эки тарап абадан сокку урушуп, андан кийин Катар менен Түркиянын ортомчулугу менен ок атышууну токтотууга макул болушкан.