Иран бийлиги АКШнын президенти Дональд Трампка жолдогон жооп катында Вашингтон менен өзөктүк программа маселеси боюнча түз сүйлөшүүлөрдөн баш тартты, бирок ортомчулар аркылуу диалогду улантуу дагы деле мүмкүн экенин билдирди.
Бул тууралуу Ислам Республикасынын президенти Масуд Пезешкян билдиргенин IRNA агенттиги жазды.
“Бул жоопто эки тараптын түз сүйлөшүүлөрү четке кагылганына карабастан, кыйыр сүйлөшүүлөргө жол ачык бойдон калгандыгы белгиленди”, – деген Пезешкяндын сөзүн анын басма сөз кызматы келтирди.
Катта Иран сүйлөшүүлөрдөн эч качан качпаганы, бир гана аткарылбаган убадалар бул маселеде көйгөйлөргө алып келгендиги, ал өлкөлөр ортосундагы ишенимди калыбына келтирүү үчүн чечилиши керектиги, ошол эле учурда сүйлөшүүлөрдүн тагдыры “америкалыктардын жүрүм-туруму менен аныкталары” белгиленет.
Эске салсак, март айынын башында АКШнын президенти Дональд Трамп Ирандын жогорку лидери Али Хаменеиге кат жөнөткөнүн, анда ал өзөктүк программа боюнча Тегеран менен келишим түзүүнү артык көрөрүн белгилеген.
27-мартта Ирандын тышкы иштер министри Аббас Аракчи Тегеран Трамптын жазган катына расмий жоопту Оман аркылуу жөнөткөнүн билдирген. Министрдин айтымында, жоопто эки документ бар. Биринчисинде Тегерандын дүйнөдөгү азыркы кырдаалга көз карашы белгиленсе, экинчисинде Трамптын катында камтылган тезистерге толук комментарий берилген.
2015-жылы Иран менен АКШ, Франция, Германия, Улуу Британия, Кытай, Россия өзөктүк келишимге кол коюшкан. Ага ылайык, Тегеран уран байытууну чектеп, буга жооп катары Иранга киргизилген экономикалык санкциялар алына баштаган. Бирок 2018-жылдын май айында Дональд Трамп президент болуп турганда АКШ келишимден чыгып, Тегеранга каршы санкцияларды калыбына келтирген. Буга жооп катары Иран келишим боюнча милдеттенмелерин этап-этабы менен кыскартканын жарыялаган. Андан бери келишимди калыбына келтирүү аракеттеринен майнап чыкпай келет.