Иран Кыргызстандын, Тажикстандын жана Өзбекстандын президенттери кол койгон үч өлкөнүн чек араларынын кесилишкен чекити жөнүндө келишимди жана түбөлүк достук жөнүндө Кожент декларациясын кубаттайт.
Бул тууралуу Ирандын Тышкы иштер министрлигинин расмий өкүлү Исмаил Багаи билдиргенин мекеменин маалымат кызматы кабарлады.
Маалыматка караганда, Багаи өз билдирүүсүндө Кыргызстан, Өзбекстан жана Тажикстандын президенттери тарабынан үч өлкөнүн мамлекеттик чек араларынын кесилишкен чекити жөнүндө келишимге жана Түбөлүк достук жөнүндө Худжанд декларациясына кол коюусун кубаттап, аны бул өлкөлөрдүн бири-биринин аймактык бүтүндүгүн жана улуттук эгемендүүлүгүн өз ара урматтоо, өз ара ишенимди орнотуу жана Борбор Азияда тынчтыкты жана стабилдүүлүктү бекемдөө багытындагы маанилүү кадам катары сыпаттады.
Эске салсак, 31-мартта, Тажикстандын Худжанд шаарында Кыргызстан, Тажикстан жана Өзбекстандын президенттеринин үч тараптуу жолугушуусу болуп, жолугушуусунун жыйынтыгы менен Үч мамлекеттин мамлекеттик чек араларынын кесилишкен чекити жөнүндө келишимге жана Түбөлүк достук жөнүндө Худжанд декларациясына кол коюлган.
Мамлекет башчылары бул документтерге кол коюу өлкөлөрдүн эгемендүүлүгүн жана аймактык бүтүндүгүн урматтоону символдоштурарын, ошондой эле Борбор Азияда конструктивдүү диалогдун жана натыйжалуу кызматташтыктын үлгүсү катары кызмат кылаарын баса белгилешти.
Жетишилген макулдашуулар өз ара ишенимди бекемдөө, туруктуулукту сактоо жана региондогу интеграциялык процесстерди өнүктүрүү үчүн жаңы перспективаларды ачат.
Буга чейин Кыргызстан, Өзбекстан жана Тажикстандын ортосунда кол коюлган келишимди Кытай, ШКУ, ИКУ жана АКШда кубаттаган.