Ислам кызматташтык уюму (ИКУ) Батыш Азиядагы чыңалуунун күчөшүнө тынчсыздануусун билдирип, Иранга каршы чыңалуунун күчөшүнө байланыштуу эскертүү берди.
ISNA маалымат агенттиги кабарлагандай, ИКУга мүчө өлкөлөрдүн тышкы иштер министрлери өткөргөн жыйында аймактагы чыңалуунун өсүшү, анын ичинде Иранга каршы күч колдонуу тууралуу акыркы коркутуулар жана аскердик күчтөрдүн провокациялык жайгаштырылышы боюнча тынчсыздануу билдиришти.
Министрлер эгемендүү мамлекетке каршы күч колдонуу же күч колдонобуз деген коркутуу эл аралык укуктун ачык бузулушу болуп эсептелерин белгилешти.
Ошондой эле алар Иран менен АКШнын ортосундагы акыркы дипломатиялык аракеттерди кубаттап, чыңалууну азайтууга багытталган конструктивдүү кадамдарды колдой турганын билдиришти.
Алар бул жараянды жеңилдетүүгө көмөк көрсөткөн Оман, Түркия, Катар, Египет жана Сауд Арабиясы сыяктуу өлкөлөрдүн ролуна ыраазычылык билдирилди.
Жыйында Израил режиминин саясатына каршы мүмкүн болгон саясий жана укуктук чараларды көрүү, анын ичинде БУУнун Коопсуздук Кеңешине, Башкы Ассамблеясына жана эл аралык сотторго кайрылуу маселеси каралды. Катышуучулар эл аралык коомчулукту Израилди колониялык баскынчылыгын токтотууга мажбурлоого чакырышты.
Ошондой эле министрлер АКШнын Израилдеги элчиси Майк Хаккабинин провокациялык билдирүүлөрү жана АКШ элчилигинин Батыш Жээктеги мыйзамсыз конуштарда жашаган израилдик отурукташкандарга консулдук кызмат көрсөтүү чечими айыпташты. Алар бул аракеттерди эл аралык укуктун ачык бузулушу катары баалашты.
Мындан тышкары, жыйында АКШ президенти Дональд Трамп сунуштаган тынчтык планын ишке ашыруу, экинчи этапка өтүү, согушту туруктуу токтотуу жана Израил күчтөрүн Газа тилкесинен толук чыгаруу зарылдыгы белгиленди.