Кытай Кошмо Штаттарын өзүнүн туура эмес аракеттерин тез арада оңдоого жана башка өлкөлөр менен пикир келишпестиктерди теңдиктин негизинде чечүүгө чакырат, деп билдирди Кытайдын Тышкы иштер министрлигинин басма сөз катчысы Го Цзякунь бүгүнкү күнкү брифингде.
АКШнын президенти Дональд Трамп 2-мартта башка өлкөлөрдөн импорттолуучу товарларга “өз ара” пошлина киргизилерин жарыялады. Трамптын айтымында, жаңы тарифтер Америка Кошмо Штаттары үчүн “экономикалык көз карандысыздыктын декларациясы” болот жана мамлекеттик карызды төлөө үчүн “триллиондогон жана триллиондогон долларларды” колдонууга жардам берет.
“Кытай Кошмо Штаттарын өзүнүн туура эмес аракеттерин тез арада оңдоого жана дүйнө жүзүндөгү өлкөлөр менен, анын ичинде Кытай менен болгон соода талаш-тартыштарын консультациялар аркылуу, тең укуктуулук, урматтоо жана өз ара пайданын негизинде чечүүгө үндөйт”, – деди Го Цзякунь АКШнын жаңы тарифтерине комментарий берип жатып.
Кытайдын Тышкы иштер министрлигинин расмий өкүлү ошондой эле пошлина бардык өлкөлөрдүн элдеринин жалпы кызыкчылыктарына зыян келтирерин жана Кошмо Штаттарга өз көйгөйлөрүн чечүүгө жардам бербей турганын белгиледи.
Анын айтымында, АКШнын тарифтери Дүйнөлүк Соода Уюмунун (ДСУ) эрежелерин олуттуу түрдө бузат жана эрежелерге негизделген көп тараптуу соода системасына зыян келтирет.
Буга чейин Кытайдын тышкы иштер министри Ван И АКШнын Кытайдан келген товарларга алымды көтөрүүсүнүн эч кандай негизи жок экенин, дүйнөлүк рынокко зыян келтирип, Вашингтондогу бийликтин аброюна шек келтиргенин билдирген.
Тышкы иштер министри эгер Кошмо Штаттары чындап эле көйгөйлөрдү чечүүнү кааласа, анда алар кытай тарап менен тең укуктуу консультацияларды өткөрүү жана өз ара пайдалуу кызматташуунун жолдорун табуу үчүн тарифтик шантажды токтотушу керек экенин айткан.