Мьянмадагы жер титирөөдөн каза болгондордун саны 3085ке, ал эми жаракат алгандардын саны 4715ке жеткенин “Синьхуа” агенттиги Мьянманын мамлекеттик административдик кеңешинин маалымат тобуна таянуу менен билдирди.
«3-апрелде жергиликтүү убакыт боюнча саат 8:00гө карата Мьянмада болгон катуу жер титирөөдөн 3085 адам каза болуп, 4715 адам жаракат алып, дагы 341 адам дайынсыз болууда», — деп айтылат агенттиктин билдирүүсүндө.
Табигый кырсыктын кесепеттерин жоюу үчүн көптөгөн өлкөлөр, анын ичинде Орусия жана Кытай, ошондой эле Дүйнөлүк саламаттыкты сактоо уюму өлкөгө өз кызматкерлерин жана ресурстарын жөнөтүшткөн.
Мьянмадагы күчү 7,7 баллга жеткен жер титирөө 28-мартта болуп, жер титирөө беш коңшу өлкөдө, анын ичинде Таиландда да сезилген.
Бангкоктогу жер титирөөдөн куткаруучулар 30 кабаттуу имараттын кулап түшкөн жеринен дагы сөөктөрдү тапкандан кийин каза болгондордун саны 29га жеткенин Nation басылмасы жазды.
«3-апрелге карата каза болгондордун саны 29га жетип, дагы тогузу жаракат алып, 59у дайынсыз болууда», – деп жазат гезит.
Басылма аткаминерлерге шилтеме берип, урандылардын астында дагы эле аман калгандар болушу мүмкүн экенин, анткени ал жерден адамдын үнү угулуп жатканын белгилейт.