Сирия бийлик алмашкандан кийин 25 миңден ашуун сириялык качкын Түркиядан мекенине кайтты.
Бул тууралуу Түркиянын Ички иштер министрлигинин башчысы Али Ерликая билдирди.
“Сирияда бийлик алмашкандан кийин 8-декабрдан бери Түркиядан 25 миңден ашуун качкын мекенине кайтып келди. Акыркы маалыматтарга караганда, Түркияда мыйзамдуу түрдө жүргөн 4,1 миллион чет элдиктин 2 миллион 920 миңи сириялыктар”, – деди министр Anadolu агенттигинин редакторлору менен жолугушууда.
Анын айтымында, Дамаск жана Сириянын башка шаарларында Түркиянын дипломатиялык өкүлчүлүктөрүндө миграция бөлүмдөрү ачылат, алар качкындардын мекенине андан ары кайтып келишине шарт түзөт.
2011-жылы Сирияда кагылышуу башталгандан бери миллиондогон сириялыктар Түркиянын чек арасын кесип өтүшкөн. Учурда түрк жеринде 3 миллиондой качкын бар.
Буга чейин Түркиянын президенти Режеп Тайып Эрдоган 2011-жылдан бери Сириядан качкан 1 миллионго жакын качкындын өз мекенине кайтып барышын камсыздоо планын билдирген.
27-ноябрда Сириядагы куралдуу оппозиция өкмөттүк армиянын Алеппо жана Идлиб провинцияларындагы турумдарына каршы кеңири масштабдагы чабуулун баштаган. 7-декабрдын кечинде алар Алеппо, Хама, Дараа жана Хомсту басып алып, 8-декабрда Сириянын өкмөттүк күчтөрүнүн бөлүктөрү таштап кеткен Дамаскка киришкен. Башар Асад Сириянын президенттигинен баш тартып, өлкөдөн чыгып кеткен.
2024-жылдын январь айынан бери Идлиб провинциясында оппозиция тарабынан түзүлгөн Куткаруу өкмөтү деп аталган өкмөттү жетектеп келген Мохаммед аль-Башир 10-декабрда 2025-жылдын 1-мартына чейин созула турган өткөөл мезгилге Сирия өкмөтүнүн башчысы болуп дайындалганын жарыялады.