Маалыматтарга караганда, чечен аскердик бөлүктөрү АКШ Иранга кургактык аркылуу басып кирген учурда Ирандын куралдуу күчтөрүн колдоо үчүн барууга даяр экенин билдиришти деп ирандык Press TV телеканалы маалымдады.
Рамзан Кадыровго лоялдуу күчтөр АКШ менен Израилдин Иран Ислам Республикасына каршы жүрүп жаткан согушун диний мүнөздөгү деп атап жатышат.
Алар мүмкүн болгон түз кийлигишүүнү «жихад» — жакшылык менен жамандыктын ортосундагы күрөш катары баалап, Иран Ислам Республикасын АКШ жана анын союздаш күчтөрүнөн коргоо катары мүнөздөшүүдө.
Бул окуя АКШ менен Израилдин Иранга каршы согушунун чыңалуусу күчөгөн шартта болуп жатат. ЖМКлардын маалыматына ылайык, АКШнын аскерлери президент Дональд Трамптын буйругу менен бир нече жумага созулган аба чабуулдары натыйжа бербегенден кийин жер үстүндөгү операцияны баштоону талап кылууда.
Согуш 28-февралда, Тегеран менен Вашингтондун ядролук программа боюнча кыйыр сүйлөшүүлөрү жүрүп жаткан маалда башталган. Анда Ислам революциясынын лидери аятолла Сейед Али Хаменеи, бир нече жогорку даражалуу командирлер жана карапайым тургундар, анын ичинде Ирандын түштүгүндөгү Минаб шаарында 170тен ашуун окуучу каза болгон.
Жооп катары Ирандын куралдуу күчтөрү Израилдин аскердик жана стратегиялык объекттерине, ошондой эле Перс булуңундагы АКШнын базаларына жана объекттерине 86 ракеталык жана учкучсуз аппараттар менен сокку урган.
Белгилей кетчү нерсе, украин аскерлери да Иран Ислам Республикасына каршы согушта АКШ менен Израилди ачык колдоп жатышат.
Көпчүлүк бул аракетти Орусияга согуш узакка созулушу мүмкүн деген эскертүү катары, ошондой эле Украинанын тагдыры Москва менен Киевдин ортосундагы жаңжалдын жыйынтыгына байланыштуу экенине ишара катары баалашууда.
Дүйшөмбү күнү Антониу Гутерришке жана БУУнун Коопсуздук Кеңешинин төрагасына жөнөтүлгөн катында Ирандын БУУдагы туруктуу өкүлү Амир Саид Иравани Украина «жүздөгөн адистерди» аймакка жөнөткөнү тууралуу билдирүүсүн айыптап, Киев АКШ жана Израил режими тарабынан Иран Ислам Республикасына каршы жүргүзүлүп жаткан аскердик агрессияга активдүү катышып жатканын белгиледи.