Япониянын бийлиги күчтүү жана катастрофалуу жер титирөө менен андан кийинки цунамиге даярданууда.
Алдын ала божомолго караганда, 8-9 баллга жеткен жер титирөөнүн ыктымалдыгы 80%га жетет. Бул 300 миңдей адамдын өмүрүн алып кетиши мүмкүн.
Япония өкмөтү жарыялаган жаңы маалыматка ылайык, өз жарандарына жана туристтерине архипелагдагы элди каптаган “мегатитирөөнүн” өтө жогору ыктымалдыгы жөнүндө эскертти.
Бул маалыматты Япониянын расмий булактарына таянуу менен Reuters маалымат агенттиги билдирди.
Божомолго караганда, күчү 8-9 баллга жеткен жер титирөөнүн 80 пайыздык ыктымалдыгы Нанкай Трогунун аймагында катталышы ыктымал.
Нанкай ойдуңу материктик Япониянын түштүк жээгинде Амурия, Охотск жана Филиппин плиталарынын ортосундагы үч чек арада жайгашкан.
Нанкай ойдуңунда жер титирөө Японияда болжол менен 100-150 жылда бир болуп турат жана адистер жакынкы келечекте ал жерде дагы бир кырсык болушу мүмкүн деп чочулашкан.
Акыркы тастыкталган жер титирөөлөр 1944 жана 1946-жылдары катталган. Токио адам өмүрүнүн потенциалдуу жоготууларын болжол менен 300 000 деп эсептейт, бул 2012-жылы жарыяланган мурунку отчеттон 10 пайызга аз. Ал эми болжолдонгон экономикалык жоготуулар 1,4 триллион доллардан 1,8 триллион долларга чейин өскөн.
Эскерте кетсек, Япония Тынч океандын сейсмикалык тилкесинде жайгашкан. Ал “От шакеги” деп аталат. Бул Тынч океандын сырткы четинде өтөт жана АКШнын Геологиялык кызматынын маалыматы боюнча, дүйнөдөгү эң ири жер титирөөлөрдүн 81 пайызы ошол жерде болот.
Япониянын жер титирөө коркунучу бар төрт негизги аралдары жана аларга чектеш аралдар жер кыртышынын беш чоң жана кичине тектоникалык плиталарында — Амур, Охотск, Тынч океан, Филиппин жана Окинавада жайгашкан.
2011-жылдын 11-мартында Чыгыш Японияда күчү 9 баллга жеткен зилзала Японияда катталган эң чоң жер титирөө болуп калган. Буга чейин болуп көрбөгөн ал кырсык цунамиге алып келип, кеминде 19 729 адамдын өмүрүн алган.