Save the Children гуманитардык уюму Улуу Британиянын өкмөтүн Израилге курал-жарак сатуу саясатын токтотууга чакырды. Уюмдун билдирүүсүндө, Израил армиясынын Газа секторунда тамак-аш жана суу күтүп турган палестиндерге жасаган чабуулдарынын кесепетинен балдар да мерт болгонун айтышты.

Уюм X социалдык тармагындагы билдирүүсүндө BBCнин маалыматына шилтеме берип:
 13-июлда Израилдин чабуулдарынын натыйжасында суу кезегинде турган 6 бала каза болгон.
 Бир апта мурун тамак-аш кошулмаларын алуу үчүн клиника алдында кезекте турган 8 бала өлтүрүлгөн.

«Бул балдардын аты-жөнү, үмүтү, келечекке болгон кыялы бар эле. Алар кимдир-бирөөнүн бүт дүйнөсү. Биз алардын азабын кадимки көрүнүшкө айлантууга жол бербейбиз».

Өкмөт эл үнүн уксун

Save the Children уюму мындай деп билдирди:

«Британ эли бул аймакта эмне болуп жатканын көрүп турат. Эл унчукпай турбайт. Өкмөт Израилге курал берүү саясатын улантып, анын зомбулуктарына өнөктөш болуп жатканда, биз унчукпай кала албайбыз. Израилге F-35 аскерий учактарына тетиктерди кошо бардык курал жеткирүүлөр дароо токтотулушу керек.»

Израилдин чабуулдарынан 700дөн ашык адам курман болгон

Газанын өкмөттүк маалымат бюросунун билдирүүсүнө ылайык, 2023-жылдын 7-октябрынан бери Израил армиясынын суусуз калтыруу жана тынч калкты бутага алуу саясатынын натыйжасында 700дөн ашык палестиналык суу үчүн кезекте турганда  каза болгон.

 13-июлда Израиль аскерлери Газанын борборунда жайгашкан Нусайрат качкындар лагеринде суу үчүн кезекте турган палестиндерге абадан сокку жасап, 12 адам, анын ичинде балдар каза болгон.

 Save the Children уюму Британия өкмөтүн адам укуктары боюнча өз позициясын кайра карап чыгууга чакырып:

«Британия Израилдин зомбулуктарына өнөктөш болбошу керек!» — деп билдирүү менен кайрылды.