Қазақстан Президенті Қасым-Жомарт Тоқаев кипрлық серіктестерді Транскаспий дәлізі жобасына атсалысуға шақырды. Орта дәліз аясында да Қазақстанның құрлықтағы және Кипрдің теңіздегі инфрақұрылымын тиімді ұштастыруға зор мүмкіндік бары айтылды.
– Никос Христодулидиспен мазмұнды келіссөз жүргіздік. Ықпалдастығымызды күшейтудің жаңа бағыттары туралы әңгімелестік. Өзара сауда-саттық көлемін арттыруға ерекше назар аудардық. Тауар айналымын ұлғайту, инвестициялық қарым-қатынасты дамыту және іскер топтардың байланысын одан әрі нығайту қажеттігін атап өттік. Бұл маңызды міндет, – деді Қазақстан Президенті Кипр президентімен келіссөздерден кейінгі БАҚ-қа мәлімдемесінде.
Қасым-Жомарт Тоқаев Қазақстан-Кипр экономикалық ынтымақтастығының жол картасын әзірлеуді ұсынғанын атап өтті.
– Біз логистика, қаржы, туризм, цифрлық технологиялар саласындағы өзара байланыстарымыздың келешегі зор деп санаймыз. Үкіметтерімізге осы бағыттар бойынша нақты шаралар қабылдау жөнінде тапсырма беруге уағдаластық, – деді Қасым-Жомарт Тоқаев.
Сонымен бірге, Президент кипрлық серіктестерді Транскаспий дәлізі жобасына атсалысуға шақырды.
– Өздеріңіз жақсы білесіздер, Кипр – әлемдік деңгейдегі теңіз алыбы саналады. Орта дәліз аясында Қазақстанның құрлықтағы және Кипрдің теңіздегі инфрақұрылымын тиімді ұштастыруға мүмкіндік зор. Бұл қадам Орталық Азия аймағы, Каспий аймағы және Жерорта теңізі арасында жаңа көпсалалы логистика жүйесін қалыптастыруға жол ашады. Сондай ақ, өзара алыс-берісімізді ұлғайтуға мүмкіндік береді, – деді Мемлекет басшысы.
Айта кетейік, 2-4 маусым күндері Мемлекет басшысы Қасым-Жомарт Тоқаевтың шақыруымен Кипр Республикасының Президенті Никос Христодулидистің Қазақстанға ресми сапары өтеді.