Ташкент қаласындағы Орталық Азия халықаралық институтында «Климаттың өзгеруі жағдайында Орталық Азия үшін су қауіпсіздігін қамтамасыз ету» тақырыбында халықаралық дөңгелек үстел өтті.
KAZINFORM мәліметінше, аталған іс-шараның Халықаралық Аралды құтқару қоры бастамасымен 22 сәуір күні Астана қаласында өтетін саммит қарсаңында ұйымдастырылуы оның маңызын одан әрі арттыра түсті.
Дөңгелек үстелде аймақ елдері мен халықаралық ұйым өкілдері климаттың өзгеруі жағдайында су ресурстары тапшылығы күшейіп келе жатқанын, бұл мәселе енді тек экологиялық емес, стратегиялық қауіпсіздік факторына айналғанын атап өтті. Әсіресе, трансшекаралық өзендер ағысының азаюы, мұздықтардың еруі және жауын-шашын тәртібінің өзгеруі Орталық Азиядағы су қамтамасыздығына елеулі әсер етіп отырғаны айтылды.
Сарапшылардың пікірінше, қазіргі жағдайда су ресурстарын ұтымды, әділ әрі тиімді пайдалану, сондай-ақ мемлекетаралық ынтымақтастықты күшейту аса маңызды. Осы тұрғыда Халықаралық Аралды құтқару қоры өңірдегі су-экология саласындағы серіктестікті үйлестіретін негізгі платформа ретінде бағаланды.
Трансшекаралық су ресурстарын басқару бойынша халықаралық тәжірибені енгізу, өңірлік ынтымақтастық тетіктерін жетілдіру және Ауғанстанды су диалогына тарту жөнінде нақты ұсыныстар әзірленді. Бұл ұсыныстар Астана саммитінің күн тәртібін қалыптастыруда маңызды рөл атқаруы ықтимал.
Отырыс соңында қатысушылар Орталық Азияда су қауіпсіздігін қамтамасыз ету тек ортақ көзқарас пен өзара сенімге негізделген ынтымақтастық арқылы жүзеге асатынын атап өтті. Осы тұрғыда аталған кездесу аймақ үшін маңызды саяси әрі сараптамалық алаңға айналды.