Грузиянын президенти Саломе Зурабишвили жана оппозициялык партиялар төңкөрүш жасоого негиз даярдоо үчүн парламенттик шайлоонун жыйынтыгын легитимсиз деп аташууда, деп билдирди парламенттин спикери Шалва Папуашвили брифинг учурунда.
“Бул сцена алдын ала даярдалган: шайлоонун жыйынтыгын легитимсиз деп табуу, андан соң техникалык өкмөт түзүү, мунун баары алар багыт алган төңкөрүштүн сценасы. Муну менен алар конституциялык түзүлүштү бузууда. Грузия буга жол бербейт”, – деди саясатчы.
Папуашвили шайлоо алдында дагы грузин оппозициясы бейөкмөт уюмдарды тартуу менен парламенттик шайлоонун жыйынтыгы боюнча өлкөдө төңкөрүш жасоону пландап жатканын билдирген.
Күн мурун президент Зурабишвили шайлоо толугу менен бурмаланганын айтып, нааразылык акцияларына чыгууга чакырган. Ал Конституция боюнча президенттин эч бир партияга тиешеси болбошу керектигине карабастан, негизги оппозициялык партияларды бириктирүүнүн демилгечиси болгон.
Республикада парламенттик шайлоо 26-октябрда болуп өттү. Борбордук шайлоо комиссиясынын маалыматы боюнча, бардык бюллетендерди санагандан кийин бийликтеги «Грузин кыялы» партиясы 53,93% добуш алып, жеңишке жетти. Ошондой эле төрт оппозициялык партия парламентке кирүүдө, алар жалпысынан добуштардын 37,78% алды.
Оппозиция өкүлдөрү добуш берүүнүн жыйынтыгын тааныбай турганын билдиришти.
Өз кезегинде ЕККУнун кыска мөөнөттүү миссиясынын атайын координатору Паскаль Ализар шайлоонун жакшы уюштурулгандыгын белгиледи.
