ФБР Пенсильвания штатынын Батлер шаарында шайлоо өнөктүгү учурунда Дональд Трампты аткан адам 20 жаштагы Томас Мэттью Крукс экенин жарыялады. Ал ата-энеси менен тынч шаар четинде жашаган жана Республикалык партиянын тарапкери болгон.
Ок Трамптын кулагына тийген – аны аткан адам чогулгандарга бир нече ок атып, бирөөнү өлтүрүп, дагы эки адамды оор жарадар кылган. Аны мурдагы президент катары жана президенттикке расмий талапкер катары Трампты кайтарган Жашыруун кызматтын офицерлери атып салышкан, деп билдирет Би-Би-Си.
Томас Крукстун жанында эч кандай документтери болгон эмес жана тергөө аны ДНК аркылуу аныктаган.
Томас Крукс ата-энеси менен Питтсбургдун тынч четиндеги Бейтел-Паркта, окуя болгон жерден 70 км алыстыкта жашаган. 2022-жылы ал мектепти аяктап, математика жана табият илимдери боюнча жыйынтыгы үчүн 500 доллар сыйлыкка ээ болгон – бул тууралуу жергиликтүү гезит жазган. Мектептен кийин Крукс жакын жерде карылар үйүнүн ашканасында иштечү.
Америкалык басма сөз маалымдагандай, республикачыл талапкер Трампка кол салууга аракет кылган жигит өзү Республикалык партиянын колдоочусу катары расмий катталган. Бирок үч жыл мурун ал Демократиялык партияны колдогон ActBlue уюмуна болгону 15 доллар болсо да акча берген.
Америкалык басылмалардын маалыматына караганда, киши колдуу болгон учурда Крукс курал-жарак жана жардыруучу түзүлүштөр тартылган видеолорду жарыялаган миллиондогон жазылуучулары бар YouTube каналынын Demolition Ranch логотиби бар футболка кийип жүргөн.
Укук коргоо органдары Томас Крукс атышууда колдонгон куралды анын атасы мыйзамдуу түрдө алты айдан ашык убакыт мурун сатып алганын аныкташкан. Бул тууралуу Associated Press анонимдүү булактарга таянып жазды.
Максаты белгисиз
ФБРдин Питтсбург кеңсесинин башчысы Кевин Рожек ишемби күнү брифингде: “Биз анын мотивин азырынча аныктай элекпиз” деди.
Тергөө бир нече айга созулушу мүмкүн, деди ал жана тергөөчүлөр Крукс Трампты атууга эмне себеп болгонун аныктоо үчүн бардык күч-аракетин аябайт.
Жекшемби күнү кечинде өткөн жаңы брифингде Рожек ФБРдин кызматкерлери айрыкча Крукстун социалдык медиасын карап жатканын айтты.
«Азырынча биз коркунучтуу эч нерсе көргөн жокпуз. Бирок али көп убакыт өткөн жок», – деди Рожек.
Мындан тышкары, ФБР департаментинин башчысынын айтымында, Крукстун телефону ФБРдин Вирджиниядагы лабораториясына экспертизага жөнөтүлгөн жана анын акыркы байланыштарын алдын ала кароо да анын жүйөөлөрү тууралуу эч нерсе көрсөткөн эмес.
ФБР ошондой эле Крукс психикалык ден соолук көйгөйлөрүн көрсөткөн эч кандай маалыматка ээ эмес.
Томастын атасы Мэтью Крукс CNN телеканалына берген маегинде ал эмне болгонун такыр билбегенин жана уулу тууралуу басма сөзгө айтуудан мурун укук коргоо органдары менен сүйлөшүү керектигин айтты.
Өлтүрүү аракетинен кийин, жекшембиге караган түнү полиция Крукстардын үйүн тегеректеги үйлөр менен бирге курчоого алып, бардык кошуналарын шашылыш түрдө эвакуациялаган. Жергиликтүү полиция муну үйдөн жарылуучу зат табылганы менен түшүндүрдү.
