Бишкектеги маршруттук таксилердин айдоочуларынын иш таштоосуна байланыштуу 34 автотранспорт ишканалары үчүн көрсөтмөлөр даярдалды.
Бул тууралуу Транспорт министрлигинин басма сөз кызматы билдирди.
31-майда Шаардык транспорт башкармалыгы укук коргоо органдарынын өкүлдөрүнүн катышуусунда шаардык кичи автобустардын каттамдарын тейлеген транспорттук компаниялардын жетекчилери менен жыйын өткөргөн.
“Бардык көрүлгөн чараларга, түшүндүрүү иштерине карабастан, Бишкектеги маршруттук таксилердин айдоочулары 2-июнда каттамга чыгышкан жок. Транспорттук көзөмөл бөлүмүнүн инспекторлору 2-июнь күнү эртең мененки саат 7ден баштап айдоочулар менен маршруттардын акыркы пункттарында чогулуп жатышты. 34 автотранспорт ишканасына көрсөтмөлөр даярдалып, бүгүн тапшырылды. “Восточный Экспресс” жана “Узар-Вест” ЖККсына карата Кыргыз Республикасынын мыйзам бузуулар жөнүндө Кодексинин 18чи жана 293чү статьяларга ылайык протоколдор түзүлөт жана ар бирине 130 эсептик көрсөткүч (13000 сом) өлчөмүндө айып пул салынат”, – деп билдирди Транспорт министрлигинин басма сөз кызматы.
Ошондой эле, учурда Бишкек шаардык мэриясынын автотранспорт агенттигинин кызматкерлери борбордо жүргүнчүлөрдү ташууну калыбына келтирүү боюнча сүйлөшүүлөрдү улантып жатканын кошумчалады.
Бишкекте 2009-жылдан бери борбор калаанын маршруттары боюнча конкурстарды өткөрүү жобосуна байланыштуу бир дагы конкурс өткөрүлгөн эмес. 2012-жылы бардык шаардык каттамдардын келишимдеринин мөөнөтү аяктаган.
