Чилиде токойдогу өрттөн каза болгон адамдар көп болуп жаткандыктан, эки күндүк аза күтүү жарыяланды.
Өлкө президенти Габриэль Борич азыр да кызыл жалын өчө элек Вальпараисо аймагында өзгөчө кырдаалдар режимин киргизүүнү жарыялады.
Х социалдык тармагына мамлекеттик соттук-медициналык кызматы жарыялаган билдирүүгө ылайык, токойдогу өрттөн каза болгон адамдардын саны 100гө жетти.
“Соттук-медициналык экспертиза кызматы Вальпараисодогу өрттөн каза болгон адамдар тууралуу расмий маалыматты берет. Азыркы учурда 99 каза болгондордун маалыматы бар”, – деп айтылат ведомствонун маалыматында.
Tercera газетасы Винья-дель-Мар шаарынын мэрине шилтеме жасап билдирүүсү боюнча, 372 адам дайынсыз жок болууда.
Президент Боричтин айтуусунда, өрттүн улам күч алып жаткандыгынан улам “трагедиядан жабыркагандардын саны жакын арада көбөйүшү” мүмкүн. Борич өрт өтө тездик менен тарап жаткандыктан, жарандарды чукул кызматтардын көрсөтмөсүнө ылайык аракет кылууну суранды.
3-февралда Чилинин Вальпараисо аймагында масштабдуу токойдогу өрттөн улам өзгөчө кырдаал режими жарыяланган. Борич аймакта кырдаал аба ырайынын өтө ысык болгондугунан жана катуу шамалдан улам бир топ татаалдашып кеткендигин билдирген. Өрт чулгаган аймак 3 миң гектарга жеткен.
Эки коммунада жалын өтө тездик менен тарагандыктан жергиликтүү жашоочулар эвакуацияланган.
Өрт болуп жаткан райондордогу аба ырайынын температурасы бүгүнкү күндө 40 градус болууда.
Чилидеги узак убакыт сакталган кургакчылыктан улам токойлор тез-тез өрттөнүп турат. 2023-жылы февралда 23 адам өрттөн каза болгон.