Түркиянын тышкы иштер министри Хакан Фидан Стамбулда ХАМАСтын кеңешме органынын төрагасы Мухаммад Исмаил Дервиш жана кыймылдын Саясий бюросунун мүчөлөрү менен сүйлөшүүлөрдү өткөрдү.
Бул тууралуу Түркиянын Тышкы иштер министрлиги билдирди.
“Жолугушуунун жүрүшүндө аймактагы, өзгөчө Газа тилкесинин түндүгүндөгү гуманитардык абал талкууланды. Хакан Фидан Түркиянын Газадагы гуманитардык апаат менен күрөшүү үчүн эл аралык коомчулукту мобилизациялоо үчүн бардык дипломатиялык каражаттарды колдоно турганын баса белгиледи. Ошондой эле барымтадагыларды жана туткундарды алмаштырууга мүмкүндүк бере турган ок атышууну токтотуу боюнча сүйлөшүүлөрдүн контекстинде да учурдагы кырдаал талкууланды», – деп айтылат ведомствонун билдирүүсүндө.
Жолугушууда ошондой эле Палестина аралык жарашуу процесси да талкууланган.
Фидан ХАМАСтын жетекчилигинин өкүлдөрүнө кыймылдын Саясий бюросунун башчысы Яхья Синвардын өлүмүнө байланыштуу көңүл айтты.
17-октябрда Израиль армиясы (ЦАХАЛ) Синвар Газанын Рафах шаарында жок кылынганын жарыялаган.
18-октябрда кыймылдын башчысынын орун басары Халиль аль-Хайя Синвар Газада өлтүрүлгөнү тууралуу маалыматты тастыктады.
Яхья ас-Синвар ХАМАС кыймылынын саясий бюросунун жаңы жетекчиси болуп август айында шайланган. Ал Тегеранда Израилдин кол салуусунда өлтүрүлгөн Исмаил Ханиянын ордуна келген болчу.
