Николас Мадуро жана анын жубайы Нью-Йорк шаарындагы сотто сөз сүйлөп, экөө тең коюлган айыптарды моюнга албай турганын билдиришти. Ошондой эле Мадуро өзүн «согуш туткуну» деп атады.
РИА Новости агенттигинин маалыматына ылайык, Николас Мадуро өзүнө коюлган айыптар боюнча күнөөсүз экенин билдирди. Нью-Йорктогу сотто ал өзүн чынчыл адам экенин айтып, Венесуэланын президенти бойдон кала берерин белгиледи.
РБКнын маалыматына караганда, Мадуро сотто испан тилинде сүйлөп, котормочунун кызматынан пайдаланган. Сот ага төрт берене боюнча айып таккан, алардын ичинде баңгизат жана курал-жарак соодасы да бар. Анын жубайы Силия Флорес да коюлган айыптарды четке какты.
«Политика» басылмасынын маалыматына ылайык, Мадуро Нью-Йорктогу сотто өзүн «согуш туткуну» деп атаган.
«Мен Венесуэланын президентимин жана өзүмдү согуш туткуну деп эсептейм. Мени Каракастагы үйүмдө кармашты. Мен күнөөсүзмүн. Мен адептүү адаммын», — деди ал.
ТАСС агенттигинин жазышынча, америкалык сот Мадурого Венесуэланын консулдук кызматкерлери менен жолугушууга уруксат берди. Ошол эле учурда, Нью-Йорктун борборундагы сот имаратынын жанында АКШнын Венесуэлага карата аракеттерине каршы нааразылык акциясы өтүүдө.
Белгилей кетүүчү жагдай, Венесуэланын оппозиция лидери Мадуронун камакка алынышы үчүн АКШга ыраазычылык билдирип, Трампты сыйлоону сунуштады.
Жыйынтыгында, Мадуронун жактоочулары кийинчерээк Венесуэланын президентин күрөө менен бошотууга жетишүүгө аракет кыларын сотко билдиришти. Судья Мадуронун иши боюнча кийинки сот отурумун 17-мартка белгиледи.
Эске салсак, ишемби түнү Каракаста жардыруулар катталган. Андан кийин Трамп АКШ Венесуэлага ири соккуларды жасаганын, ал эми Венесуэланын президенти Николас Мадуро жубайы менен кошо кармалып, өлкөдөн чыгарылганын билдирген.
МККлардын жазышынча, Венесуэлага жасалган соккулардан ондогон адамдар каза болгон. Ал эми АКШнын мамлекеттик катчысы бул окуяны согуш же Венесуэлага басып кирүү деп атоодон баш тарткан.
Бүгүн Мадуро кармалгандан кийинки биринчи видеосу интернетке чыкты. Ошондой эле Мадуро АКШдагы эң белгилүү адвокаттардын бири Барри Поллакты жалдаганы маалым болду.