Пакистандын коргоо министри Хаваджа Асиф Х соцтармактагы баракчасына резонанстуу билдирүү жарыялап, анда Израилди адамзат үчүн каргыш жана жамандык деп атады.
“Израиль — адамзат үчүн каргыш жана жамандык. Исламабадда тынчтык сүйлөшүүлөрү жүрүп жаткан чакта, Ливанда геноцид болуп жатат. Күнөөсүз жарандар Израиль тарабынан өлтүрүлүүдө: алгач Газа, андан кийин Иран, эми болсо Ливан — кан төгүү токтобой уланууда. Европалык жөөттөрдөн кутулуу үчүн Палестина жеринде бул “рак илдетиндей мамлекетти” түзгөндөр тозокто күйөт деп үмүт кылам жана дуба кылам”, – деп жазган Асиф.
Коргоо министринин бул билдирүүсү Исламабадда АКШ менен Ирандын ортосундагы сүйлөшүүлөр башталганга бир күн калганда жарыяланды. Пакистан АКШ менен Ирандын ортосундагы сүйлөшүүлөрдө негизги ортомчу катары иш алып барып, бул акыры эки жумалык ок атышууну токтотууга алып келген. Азыркы тапта Исламабадда сүйлөшүүлөргө даярдык жүрүүдө.
Израилдин премьер-министри Биньямин Нетаньяхунун кеңсеси Пакистандын коргоо министри Хаважа Асифтин билдирүүсүнө дароо реакция жасап, нааразычылыгын билдирди.
Жооп катары Нетаньяхунун кеңсеси мындай риторика эч бир өкмөттөн, айрыкча эл аралык сүйлөшүүлөрдө ортомчу катары өзүн көрсөткөн мамлекеттин өкүлү тарабынан айтылганы кабыл алынгыс экенин белгиледи.