Иран менен АКШнын ортосундагы чыр-чатакты жөнгө салуу боюнча сүйлөшүүлөрүнүн жаңы айлампасы май айынын аягында ажылыктын негизги жөрөлгөлөрү аяктагандан кийин Пакистанда өтөт.
Бул тууралуу саудиялык Al Arabiya телеканалына булактар билдиришкенин ISNA News агенттиги жазды.
“Кийинки сүйлөшүүлөр ажылык аяктагандан кийин Исламабадда өтөт”, – деп белгилешкен булактар.
Ошондой эле булактар Пакистандын армия башчысы Асим Мунир Тегеран менен Вашингтондун ортосундагы келишимдин акыркы долбоору даярдалганын жарыялоо үчүн 21-майда Иранга барышы мүмкүн экенин билдиришкен.
Телеканалдын маалыматына караганда, Пакистан ажылыктан кийин Иран менен АКШнын ортосундагы сүйлөшүүлөрдү өткөрүүгө даяр экенин билдирген.
Мекке жана Мединага жыл сайын өтүүчү мусулмандардын зыяратынын негизги жөрөлгөлөрү, атап айтканда, Арафат тоосунда туруу жана андан кийинки Курман айт майрамы 26–27-майга белгиленген.
АКШ жана Израиль 28-февралда Иранга каршы согуш башташкан. Иран агрессияга жооп катары Израилге жана АКШнын Жакынкы Чыгыштагы аскердик объекттерине чабуулдарды жасай баштаган. Согуш кыркы күндөй созулуп, акыры 7-апрелде АКШнын президенти Дональд Трамп Ислам Республикасы менен эки жумалык өз ара ок атышууну токтотууну жарыялаган.
11-апрелде Тегеран менен Вашингтон Исламабадда сүйлөшүүлөрдү жүргүзүшкөн, бирок бир катар пикир келишпестиктерден улам тараптар узак мөөнөттүү келишим боюнча макулдашууга жетише алышкан эмес.
21-апрелде АКШнын президенти Иран менен ок атышууну токтотууну узартуу ниетин билдирген. Ошондон бери сүйлөшүүлөрдүн жаңы айлампасы боло элек. Тараптар Пакистандын ортомчулугу менен өз талаптары камтылган сунуштарды алмашышкан.
18-майда Иран менен АКШ ортосундагы диалогду ортомчулук кылган өлкөнүн өкүлү болгон Пакистандын ички иштер министри Мохсин Раза Накви Тегеранга болгон сапарын жыйынтыктап, бир нече күн бою жогорку даражалуу өкмөт өкүлдөрү менен Ирандын позициясын талкуулаган. Исламабадга учар алдындагы акыркы жолугушуусу тышкы иштер министри Аббас Аракчи менен болду. Al Arabiya телеканалынын маалыматы боюнча, Накви Ирандагы сүйлөшүүлөрүнүн жыйынтыктары тууралуу “бардык кызыкдар тараптарга маалымат берген”.