Ирандын Ислам революциясынын сакчылар корпусу АКШны өлкөнүн аба мейкиндигине басып кирген деп айыптап, Тегеран жооп кайтаруу укугун өзүнө калтыраарын билдирди.
“АКШ армиясы аймактагы авантюристтик аракеттерин улантып, Перс булуңунда Ирандын аба мейкиндигин бузду”, – деп айтылат Fars маалымат агенттиги тараткан Ислам революциясынын сакчылар корпусунун билдирүүсүндө.
Ислам революциясынын сакчылар корпусу абадан коргонуу каражаттарын колдонуп, MQ-9 учкучсуз учагын атып түшүргөнүн, ошондой эле F-35 учагын жана RQ-4 учкучсуз аппаратын Ирандын аба мейкиндигинен чыгып кетүүгө мажбурлаганын белгиледи.
Ирандык күчтөр АКШ армиясы тарабынан ок атышууну токтотуунун ар кандай бузулушуна каршы жооп кайтаруу чараларын көрүүнү өзүнүн мыйзамдуу укугу деп эсептей турганын эскертти.
26-майга караган түнү АКШнын Борбордук командачылыгы (CENTCOM) Fox News каналына АКШ күчтөрү Ирандын түштүгүнө сокку урганын ырастаган. Алар соккулар АКШнын аскер кызматкерлерин Ирандын куралдуу күчтөрүнүн коркунучтарынан коргоо үчүн өзүн-өзү коргоо максатында жасалганын такташты.
Ошол эле учурда бул соккулар коргонуу максатында гана жасалганы, ок атышууну токтотуу боюнча келишимдин бузулушу тууралуу сөз болбогону белгиленген.