Казакстандын Тышкы иштер министрлиги Астанада “Талибанга” элчилик үчүн имарат берүү пландалып жатканын тастыктады.
Бул тууралуу 17-апрелде ТИМдин расмий өкүлү Айбек Смадияров маалымдады.
Смадияровдун айтымында, казак өкмөтү “Ооганстандын жаңы өкмөтүнүн дипломаттарын” аккредитациядан өткөрүүгө макул болгон.
“2021-жылы августта Ооганстанда бийлик кулаган соң вакуум пайда болду. Ооганстандын чет элдеги мурдагы элчиликтери бул өлкөнүн атынан кызмат кылууну токтотту”, – деди Смадияров.
ТИМ өкүлү Казакстанда “талиптердин элчилигин” ачуу бул кыймылдын бийлигин таануу дегенди билдирдирбей турганын айтты. Смадияров “Талибанды” таануу – БУУнун укугу экенин эскертти.
15-апрелде Казакстандын премьер-министринин орун басары – соода жана интеграция министри Серик Жумангарин Кабулда “Талибандын” вице-премьери Абдул-Гани Барадар менен жолугушуу өткөргөн. Тараптар экономикалык маселелерди сүйлөшкөн.
_280x157.jpg)
Гуманитардык жана соода миссиясы менен Кабулга барган Жумангарин ошондой эле ооган тарапка азык-түлүк (сүт консервалары, өсүмдүк майы, ун, гречка) жана дары-дармектен турган жалпы көлөмү 5403 тоннаны түзгөн гуманитардык жардамды тапшырган.
Ал Бародар менен жолугушуудан тышкары, Ооганстандын соода жана өнөр жай министринин милдетин аткаруучу Нуриддин Азизи, тышкы иштер министри Амир Хан Муттаки, байланыш жана телекоммуникация министри Наджибулла Хаккани менен да жолугушкан.
Ошондой эле бизнес-форум учурунда Ооганстанда Казакстандын соода үйүн ачууну, анын башкы кеңсеси Герат шаарында жайгашаары сүйлөшүлдү.
2022-жылы Казакстан менен Ооганстандын ортосундагы соода жүгүртүү 987,9 миллион долларды түзүп, 2031-жылдын ушул мезгилине салыштырмалуу (474,3 миллион доллар) 2,1 эсеге көп болгон. Казакстандан Ооганстанга экспорт 2022-жылы 2,1 эсеге өсүп, 978,9 млн долларды түзгөн. 2022-жылы Ооганстандан Казакстанга импорт 82,6%га өсүп 9,1 млн долларды түзгөн.
Үстүбүздөгү жылдын январь-февраль айларында Казакстан менен Ооганстандын ортосундагы соода жүгүртүү 282,6 миллион долларды түзүп, өткөн жылдын ушул мезгилине салыштырмалуу (145,2 миллион доллар) 94,6%га көп болгон. 2023-жылдын январь-февраль айларында Казакстандан Ооганстанга экспорт 95%га өсүп, 281,5 млн долларды түзсө, Ооганстандан Казакстанга импорт 28,3%га өсүп, 1,1 млн долларды түзгөн.