Москвада рекорддук кар жаады: мындай көрүнүш жарым кылымдан бери болгон эмес.
«Фрэнсис» циклонунун айынан январь айындагы жаан-чачындын дээрлик жарымы түштү.
«Фрэнсис» циклонунун кесепетинен Москвага жааган кар акыркы 50 жылдагы эң күчтүүсү болду. Бир сутканын ичинде борбор калаада суу эквивалентинде 22 мм жаан-чачын түштү — бул январь айындагы орточо айлык норманын 42 пайызына туура келет, деп жазат РБК.
«Фобос» аба ырайы борборунун алдыңкы адиси Евгений Тишковец билдиргендей, бул жолку кар жаашы 1976-жылдын январындагы көрсөткүчтөн (ал кезде 12,9 мм жаан-чачын катталган) кыйла ашып өтүп, акыркы 50 жылдагы жаңы рекордду жаратты.
Байкоолордун бүт тарыхындагы абсолюттук максимумга жетиш үчүн болгону 1 мм жетишпей калды — 1970-жылдын январындагы рекорд алиге чейин бузулган жок.
«Чынында, кыштын чок ортосунда мындай кар коллапсын Москва 56 жылдан бери көрө элек», — деп белгиледи синоптик.
Бир сутканын ичинде Москвада кар катмарынын орточо бийиктиги 23 см.ге, Внуководо 32 см.ге, ал эми Долгопрудныйда 33 см.ге жогорулады. Бул шаарда айлык норманын 60 пайызынан ашык жаан-чачын түштү.
Москва облусунда бул кышта биринчи жолу кар күрткүлөрүнүн бийиктиги жарым метрден ашты: Черусти айылында 51 см. кар катталды. Балчуг районунда кар күрткүлөрү 39 смге жетип, бул жылдын ушул мезгили үчүн климаттык нормадан бир жарым эсе жогору болду.
Тишковец ошондой эле дем алыш күндөрү борбордо абанын температурасы төмөндөп, жаан-чачындын интенсивдүүлүгү азаярын билдирди — болгону 1 мм.ден ашпаган жеңил кар күтүлөт.
Бирок дүйшөмбү күнү, 12-январда, Борбордук Россияга түштүктөн жаңы циклон келет. Ал 2 мм.ден 7 мм.ге чейин жаан-чачын алып келиши мүмкүн.
«Ошентип, коммуналдык кызматтар менен Москва жана облус тургундарынын стихиянын кесепеттерин жоюу үчүн болжол менен эки сутка убактысы бар», — деп жыйынтыктады синоптик.
Шереметьево аэропортунда кардын айынан коллапс болду
Ошол эле учурда катуу кар жаашынан улам Шереметьево аэропортунда транспорттук коллапс жаралды: айрым каттамдар токтотулуп, жүзгө жакын рейс кечигип, жүргүнчүлөр жүктөрүн узак убакыт күтүүгө аргасыз болушту, деп жазат Медуза.
9-январдын кечинен тарта аэропорттун келүү зонасында миңдеген жүргүнчүлөр топтолду. Жүк күтүп, адамдар отургучтарды, кафелерди жана дүкөндөрдү ээлешти, ал эми орун калбай калганда — түз эле полго, тепкичтерге жана өтмөктөргө отурушту. «Аэрофлот» жана «Россия» авиакомпанияларынын жүргүнчүлөрүнө жүктү үйүнө чейин жеткирүү кызматы сунушталды.
Жүргүнчүлөр ошондой эле «Аэрофлоттун» өкүлдөрү тарабынан дээрлик эч кандай жардам көрсөтүлбөгөнүн айтышты. Алардын айтымында, авиакомпаниянын кызматкерлери маалымат бербей, болгону «күтүңүздөр» деп жооп беришкен.
«Адамдар менен эч кандай иш жүргүзүлгөн жок. Бизди эч ким тынчтандырган жок, эч нерсе түшүндүрүлгөн жок жана эч нерсе убада кылынган жок», — деди Бангкок — Москва каттамынын жүргүнчүсү Юлия.
Baza телеграм-каналы билдиргендей, аэропорттогу жүк издөө пункту Росгвардиянын кызматкерлери менен күчөтүлгөн. Ошондой эле каналдын маалыматына караганда, Шереметьеводо жүргүнчүлөр менен аэропорт кызматкерлеринин ортосунда түртүшүүлөр да болгон.
10-январга караган түнү Шереметьевонун басма сөз кызматы аэропорттун каттамдарды кабыл алуусу убактылуу токтотулганын билдирди — алгач саат 8:00гө чейин, кийинчерээк чектөөлөр 10:00гө чейин узартылды.
Саат 11:52де аэропорттун телеграм-каналында иш толук калыбына келтирилгени тууралуу билдирүү жарыяланды: аэропорт ачык, каттамдар жаңыртылган график боюнча аткарылууда, жүктөр толугу менен берилди, жүк берүү аймагында жүргүнчүлөрдүн топтолушу жок.