Ирандын жогорку лидери Можтаба Хаменеи ар кандай кылмыштар үчүн соттолгон 2 миңден ашуун жаранга мунапыс берүү тууралуу жарлык чыгарды.
Бул тууралуу анын Telegram-каналында жарыяланган билдирүүдө айтылат.
Маалыматка ылайык, мындай чечим диний майрамга байланыштуу кабыл алынган. Жарлыкта «мунапыс берүү же өкүмдөрдү жеңилдетүү» каралгандыгы белгиленген.
Бул — Можтаба Хаменеи атасы аятолла Али Хаменеи каза болгондон кийин Ирандын жогорку лидери болуп шайлангандан берки кол койгон алгачкы мунапыс жарлыгы.
Ошол эле учурда өлкөнүн сот тутумуна байланышкан Mizan агенттиги мунапыс тыңчылыкка айыпталган адамдарга жана Ирандын коопсуздугуна каршы кылмыш жасагандарга жайылтылбай турганын тактады.
Диний майрамдарга карата мунапыс жарыялоо Ислам Республикасында кадимки тажрыйба болуп саналат. Ошондуктан жаңы жогорку лидердин биринчи расмий жарлыгы дал ушул мунапыс маселесине арналды.
Можтаба Хаменеи Ирандын жогорку лидери кызматына атасы Али Хаменеинин ордуна келген. Али Хаменеи 28-февралда АКШ менен Израилдин Ислам Республикасына жасаган соккуларынын биринчи күнүндө шейит болгон.
Жаңы лидер кызматка киришкенден бери азырынча эл алдына чыга элек. Бирок анын басма сөз кызматы мезгил-мезгили менен анын атынан кайрылууларды жана билдирүүлөрдү таратып келет.