«Жакынкы бир нече күндүн ичинде өз ара түшүнүшүү жөнүндө меморандумга аралыктан кол коюлушу ыктымал», — Аббас Аракчи
Ирандын тышкы иштер министри Аббас Аракчи жакынкы күндөрү АКШ менен өз ара түшүнүшүү жөнүндө меморандумга санариптик форматта кол коюлушу мүмкүн экенин билдирди.
Ирандын мамлекеттик телеканалында сүйлөп жатып, Аракчи сүйлөшүү жараянынын учурдагы жүрүшүнө токтолду.
«Жакынкы бир нече күндүн ичинде өз ара түшүнүшүү жөнүндө меморандумга аралыктан кол коюлушу мүмкүн», — деди ал.
Министр меморандумдагы жоболор иш жүзүндө аткарылбаса, акыркы келишим боюнча сүйлөшүүлөр жүргүзүлбөй турганын баса белгиледи.
«Эгер 60 пайызга чейин байытылган уран маселеси чечилиши керек болсо, аны жөнгө салуунун жалгыз жолу — ошол уранды Ирандын өзүндө кайра суюлтуу (байытуу деңгээлин төмөндөтүү) болуп саналат», — деди Аракчи.
Мындан тышкары, ал меморандумдун долбоорунда Ормуз кысыгына жана АКШ тарабынан киргизилген деңиз блокадасын алып салууга байланышкан жоболор камтылганын билдирди.
«Ормуз кысыгын башкаруу мурдагыдан айырмаланат. Кысык Оман менен Ирандын эгемендүүлүк аймагында жайгашкан. Ушул убакка чейин эки өлкө тең кысыктагы кызматтарды акысыз көрсөтүп келишкен. Биз Ормуз кысыгын башкаруу боюнча Оман менен оң сүйлөшүүлөрдү өткөрдүк. Биздин кылычыбыз Ормуз кысыгынын үстүндө болот», — деди ал.
Министр ошондой эле келишимдин алкагында Ирандын тоңдурулган активдерине жетүү механизмдери каралганын айтты.
«Бул келишимдин каршылаштары бар жана алардын эң башкысы — Израилдин режими», — деди Аракчи.
Ошол эле учурда ал маалымат каражаттарында жарыяланган келишим тексттерин ырастабай турганын белгиледи.
«Эгер инфраструктурабызга карата коркутуулардан улам артка чегинмек болсок, анда муну алда качан эле жасамакпыз. Эгер меморандумдагы жоболор аткарылбаса, акыркы келишим боюнча сүйлөшүүлөр жүргүзүлбөйт», — деп жыйынтыктады Ирандын тышкы иштер министри.