Кыргызстан мусулмандарынын Аалымдар Кеңеши Палестина боюнча билдирүү таратты.
“Урматтуу мекендештер, урматтуу мусулман бир туугандар!
Кыргызстан мусулмандарынын Аалымдар Кенеши жана Кыргызстан мусулмандарынын Дин башкармалыгы Израиль өлкөсүнүн Палестинанын карапайым калкына каршы жасап жаткан согуштук кыргынын адамзаттык кылмыш деп айыптайбыз. Мусулман дүйнөсүнө Кудай Таалам өзү жар болсун, өзү колдосун. Бул кайгы бир гана палестиналыктардын эмес, бүт дүйнөдөгү мусулмандардын кайгысы болууда. Болуп жаткан согуштун ырайымсыздыгын дүйнө элдери айыптап, тезирээк токтотууну талап кылышууда.
Биз, Кыргызстан өлкөсү географиялык жактан алыс жайгашканыбызга байланыштуу, моралдык жана материалдык жардамыбызды берүүнү туура деп чечтик. Ошондуктан эл чогулган жерлерде, мечит-медреселерде, жума намазга келген жамааттар менен, жадагалса ар бир мусулмандын жеке ибадаттарында Палестина эли үчүн дуба кылууга чакырабыз. Эң негизгиси, материалдык жардам көрсөтүү шариятыбыздын учурдагы абалга карата мойнубузга жүктөгөн талабы болуп саналат”, — деп айтылат билдирүүдө.
Ошондой эле Аалымдар Кеңеши Палестина калкына карата жарыяланган каргашалуу согушка байланыштуу соцтармактарда ар кандай чакырыктар жайылып жатканын белгилешти.
“Чакырыктарды аалымдарыбыз иликтеп чыгышты. Жыйынтыгында мусулман бир туугандарыбызга болгон жардамыбыз руханий жана материалдык болууга тийиш деген бүтүмгө келдик. Ошондуктан эмоциалдык сезимдерге алдырып жеке же кандайдыр бир уюшкан топтор менен бирге жихад деген ниетте Палестинага баруу шарияттык эрежелерге сыйбайт деп эсептейбиз”, — деп айтылат билдирүүдө.
Эске салсак, буга чейин соцтармактарда Палестинадагы жихадга чакырган билдирүүлөр жайылып жаткандыгына байланыштуу УКМК эскертүү жасаган.
