Казакстандын президенти Касым-Жомарт Токаев Түндүк Европанын бир катар мамлекеттеринде Курандын өрттөлүшүн азыркы дүйнөдөгү чыңалууну күчөтүүгө, элдердин жана мамлекеттердин ортосундагы ишенимди бузууга багытталган жол берилгис провокация деп эсептейт.
Бул тууралуу Акордадан кабарлашты.
“Дүйнөлүк жана салттуу диндердин лидерлеринин съездинин демилгечиси болгон республикада түрдүү конфессиялардын өкүлдөрү тынчтыкта жана бири-бирин урматтап жашашат. Съезд салттуу диндердин жана конфессиялардын көрүнүктүү өкүлдөрүнүн натыйжалуу жана жемиштүү диалогу үчүн аянтча болуп калды”, – деп айтылат билдирүүдө.
Токаевдин айтымында, диний вандализм жана тиешелүү мамлекеттердин жарандарынын жоопкерчиликсиз жүрүм-турумунун көбөйүшү мамлекеттер менен диндердин тынчтыкта жанаша жашоосуна терс таасирин тийгизүүдө. Буларды жалпы таанылган нормаларга карама-каршы келген аракеттер катары бир добуштан айыпталыш керек.
Ал ошондой эле БУУнун Башкы ассамблеясы да бул маселе боюнча өзүнүн салмактуу сөзүн айтышы керек деп эсептеди.
