Катарда өтүп жаткан дүйнө чемпионатында плей-офф баскычына чыккан жана үйлөрүнө кайткан командалар аныкталууда.
Кечээ, 29-ноябрда Катардагы футбол боюнча дүйнө чемпионатында 3-турдун алгачкы төрт беттеши орун алды. А жана В тайпаларынын бул беттештеринен кийин 1/8 финалына кимдер чыкканы ошондой эле кайсы командалар үйлөрүнө кайтканы аныкталды.
Кечээки беттештеде А тайпасынан плей-офф баскычына Нидерланды менен Сенегал курамалары чыкты.
Нидерланддар Катарга каршы ойноп, 2:0 эсебинде жеңишке жетип, турнирдик таблицада 1-орунга чыкты. Голду Коди Гакпо киргизди.
Кийинки чечүүчү оюнда Сенегал Эквадорду 2:1 эсеби менен утуп, плей-оффко чыкты.
Нидерланддар 7 упай менен А тайпасында биринчи болсо, сенегалдыктар 6 упай алып, 2-орунду ээледи.
Эми Нидерланддар плей-оффто (1/8 финал) В тобундагы экинчи орунду алган команда менен беттешет.
В тайпасынан плей-оффко Англия менен АКШнын курмалары чыгышты. Англия Уэльсти 3:0 эсебинде утуп, В тайпасында 7 упай менен биринчи орунга чыкты.
В тобундагы чечүүчү беттеште Иран АКШга 0:1 эсебинде жеңилип калып, плей-оффко өтпөй калды. Жалгыз голду беттештин 38-мүнөтүндө Кристиан Пулишич киргизди.
АКШ бул оюнда 5 упай алып, экинчи орунга чыкты.
Белгилей кетсек, АКШ менен Ирандын командалары дүйнөлүк чемпионатта экинчи жолу беттешти. 1998-жылы ирандыктар тайпалык баскычта АКШны 2:1 эсебинде жеңип алган болчу.
Ошентип 1/8 финалда Англия 4-декабрда сенегалдыктар менен беттешсе, америкалыктар 3-декабрда Нидерланддар менен беттешет.
Буга чейин эки турдун жыйынтыгы боюнча Франция, Бразилия жана Португалия курамалары 1/8 финалга өткөн.
