Американын алдынкы университеттеринин кампустарында Израилге каршы демонстрациялар уланып жатат. Бир нече жума мурун кырдаал көзөмөлдөнүп тургандай сезилген, бирок азыр кээ бир колледждерде митингдер кагылышуулар жана камоолор менен коштолуп жатат.
Учурда Палестинаны колдоо жана Израилге каршы нааразычылык акциялары 23 университетте жана колледжде уланууда, алардын көпчүлүгү өлкөнүн элиталык окуу жайларынын катарына кирет: Массачусетс технологиялык институту, Колумбия университети, Гарвард, Йел, Принстон (акыркы төртөө атактуу Плюща лигасына кирет), Мичиган университети, Беркли ж.б.
Студенттер чатыр лагерлерин куруп, митингдерди өткөрүшүүдө. Алар университеттердин жетекчилигин Израиль менен бардык кызматташтыкты токтотууга чакырышууда. Нааразылык акциялары көбүнчө Израилди колдогон студенттер менен кагылышуу жана полициянын кийлигишүүсү менен коштолууда.
Нью-Йорктогу Колумбия университетинин администрациясы уланып жаткан акциялардын жетинчи күнү Улуттук гвардияны чакыруу менен коркутуп, студенттерден башкы кампустагы чатыр лагерин демонтаждоону талап кылды. Өткөн аптада бул университетте жана ага караштуу Барнард колледжинде полиция департаменти тарабынан жүздөн ашуун демонстранттар кармалып, акцияга катышкан ондогон студенттер сабактан четтетилген.
New York University (NYU) университетинде дүйшөмбү күнү 130дан ашык адам камалды. Йелде 60тай адам камалганы белгилүү.
Демонстрациялар болгон же уланып жаткан бардык кампустарда студенттер Газадагы ок атууну биротоло токтотууга чакырышууда. Алар ошондой эле Израилге финансылык колдоо көрсөтүүнү, курал-жарак жеткирүүнү токтотууну жана эки өлкөнүн университеттеринин ортосундагы өнөктөштүктү үзүүнү талап кылышууда.
АКШнын Техас штатындагы Остин шаарынын студенттери жергиликтүү түрмө имаратынын алдына чогулуп, Палестинаны колдоо акциясында кармалган 50дөн ашык адамды бошотууну талап кылышууда.
Нетаньяху студенттердин акциясын антисемиттик деп атады
Израилдин премьер-министри Биньямин Нетаньяху Палестинаны колдоо боюнча АКШнын университеттеринде уланып жаткан акцияларга кыжырдануусун билдирип, аларды антисемиттик деп атап, бул нааразылык акцияларын токтотууну талап кылды.
“Америкалык колледждердин кампустарында болуп жаткан окуялар үрөй учурат. Антисемиттик топтор алдыңкы университеттерди басып алышты. Алар Израилди жок кылууга чакырып жатышат. Алар жөөт студенттерине жана мугалимдерине кол салып жатышат. Бул 1930-жылдары Германиянын университеттеринде болгон окуяларды эске салууда. Муну токтотуп, айыптоо керек. Бирок андай болгон жок. Бир нече университеттердин ректорлорунун реакциясы маскаралык”, – деди Нетаньяху.
Нетаньяху антисемитизмди тез арада токтотуу керектигин баса белгиледи.
