Ирандын Коопсуздук кеңешинин катчысы Али Акбар Ахмадиян Санкт-Петербургда өтө турган коопсуздук маселелерин көзөмөлдөгөн жогорку өкүлдөрдүн XII эл аралык жыйынына катышат.
Ахмадиян иш-чарага ирандык делегациянын башында Россиянын Коопсуздук кеңешинин катчысы Николай Патрушевдин чакыруусу менен келет.
Санкт-Петербургда Ахмадиян ошондой эле Россия, Бразилия, Түштүк Африка, Кытай, Индия жана Ирактагы кесиптештери менен өзүнчө жолугушууларды өткөрөт.
Жыйын 23-25-апрелде өтүп, ага коопсуздук кеңештеринин катчылары, улуттук коопсуздук боюнча кеңешчилер, вице-премьер-министрлер, күч түзүмдөрүнүн жана атайын кызматтардын жетекчилери, ошондой эле эл аралык уюмдардын өкүлдөрү катышат.
Күн тартибинде эл аралык коопсуздукту, тынчтыкты жана туруктуулукту сактоонун ажырагыс элементи катары улуттук иденттүүлүктү жана салттуу баалуулуктарды сактоо темасы да камтылат.
Мындан тышкары, эки тематикалык тегерек столдун алкагында талкуулар өткөрүлөт. Ар кайсы өлкөлөрдүн өкүлдөрү мыйзамсыз миграцияга каршы күрөшүү, ошондой эле аскерий жаңжалдарда, табигый жана техногендик мүнөздөгү өзгөчө кырдаалдарда калкты коргоо боюнча кызматташууну талкуулашат. Ошондой эле эки тараптуу форматта бир катар жолугушуулар пландалууда.
Буга чейин 14-апрелде Россиянын Коопсуздук кеңешинин катчысынын биринчи орун басары Рашид Нургалиев алдыдагы иш-чаранын негизги темаларынын бири өнүгүп келе жаткан көп полярдуу дүйнөнүн шартында маалымат коопсуздугу болорун билдирген.
Коопсуздук маселелерин көзөмөлдөгөн жогорку өкүлдөрдүн эл аралык жыйыны 2010-жылдан бери Россиянын Коопсуздук кеңешинин алдында өткөрүлүп келет. Өткөн жылы ал Подмосковьеде болуп, ага 100дөн ашуун өлкөнүн өкүлдөрү катышкан.
Буга чейин аталган иш-чара Екатеринбург, Санкт-Петербург, Владивосток, Казань, Улан-Удэ, Грозный, Тверь облусу, Уфа жана эки жолу Сочиде өткөн.
