Александр Лукашенко Украина Беларусь менен чек арасына жакын аймакка 120 миңден ашуун күчтөрүн жайгаштырганын, Беларусь ага жооп катары чекарага армиясынын дээрлик үчтөн бир бөлүгүн жайгаштырууга аргасыз болгонун билдирди.
Бул тууралуу ал “Россия-1” мамлекеттик телеканалына берген маегинде билдирди.
“Алар беларус-украин чек арасында 120 миңден ашык украиналык аскерлерди биздин чек арада кармап турушат. Алардын агрессивдүү саясатын көрүп, биз аскерлерибизди бүт чек арага жайгаштырдык”, – деди Лукашенко.
Беларусь лидери ошондой эле чек арадагы кырдаалдын курчушу июнь айынын аягы – июлдун башында Минскиде Эгемендүүлүк күнүндө өтүүчү парадга даярдык учурунда байкалганын белгиледи.
Лукашенконун айтымында, анда Белоруска көптөгөн учуучу аппараттар - тик учактар, учактар жана кургактагы күчтөрдүн бөлүктөрү жайгаштырылган.
Беларусь, өз кезегинде, ага жооп катары чек арадагы коопсуздукту күчөтүүгө аргасыз болуп, ал жерге республиканын армиясынын дээрлик үчтөн бири жөнөтүлгөн.
Буга чейин Лукашенко сүйлөшүү үстөлүнө отуруп, Украинадагы “жаңжалды” токтотуу керектигин айткан. Беларус лидеринин айтымында, Украина боюнча сүйлөшүүлөр Стамбулда токтогон жерден башталышы керек.
Ал Москва менен Киевдин өкүлдөрү сүйлөшүүлөрдү баштабаса, Украина талкаланарын билдирди.
“Сүйлөшүү үстөлүнө отуруп, маселелерди талкуулаш керек, бирок бул Курсктагыдай болуп кетсе, бул Украинанын талкаланышы менен аяктайт”, – деди Лукашенко.
Ошол эле учурда Украинанын Мамлекеттик чек ара кызматынын өкүлү, полковник Андрей Демченко украин чек арачылары чек арада беларус аскерлеринин техникасынын жана жеке курамынын санынын көбөйгөнүн байкабаганын «Украинская правда» гезитине билдирди.
Ал Украина менен чек арага армиясынын үчтөн бир бөлүгүн жайгаштырганын жарыялаган Беларусь президенти Александр Лукашенкону кырдаалды курчутуп жатат деп айыптады.
