Израилдин Иранга каршы акыркы согушу Teль-Авив үчүн алгачкы он күндүн ичинде эле 7 миллиард доллардан ашык чыгым алып келди. Бул сумма өлкө үчүн олуттуу экономикалык кесепеттерге алып келиши мүмкүн.
Бул тууралуу Tasnim маалымат агенттиги Wall Street Journal жана Economic Times India басылмаларында жарыяланган маалыматтарга таянып билдирди.
Андагы маалыматтарга караганда, согуштун алгачкы он күнүндө Израилдин аскердик жана коргонуу чыгымдары 7 миллиард долларга жакындаган. Буга согуштун алгачкы эки күнүндөгү 1,45 миллиард долларлык аскердик чыгымдар жана кийинки күндөрү күнүнө орточо 725 миллион доллар коргонуу жана аскер чыгымдары кирет.
Натыйжада, он күн ичинде түз аскердик чыгымдардын жалпы көлөмү болжол менен 7,25 миллиард долларга жеткен.
Аскердик чыгымдардан тышкары, жарандык экономикага келтирилген зыян — ишканалардын жабылышы, инфратүзүмдөрдүн бузулушу жана өндүрүш көлөмүнүн төмөндөшү боюнча өзүнчө баалоо жүрүп жатат. Расмий булактар жарандык чыгымдардын так көлөмү боюнча азырынча маалымат бере элек.
Алгачкы талдоолорго ылайык, мындай көлөмдөгү чыгашалар Израилдин бюджетине кошумча оорчулук келтирди.
Wall Street Journal буга чейин эксперттерге шилтеме берип, Израилге Ирандын соккуларынан калыбына келтирүү иштерине кеминде 400 миллион доллар керектелерин билдирген.