Россиянын президенти Владимир Путин индиялык Aaj Tak жана India Today телеканалдарынын алып баруучуларынын суроолоруна жооп берди. Интервью Россия президентинин Индияга мамлекеттик сапарына карата алдын ала уюштурулду. Мамлекет башчысы Индияга мунай жана аскердик продукция экспорттоо келечеги жөнүндө айтып, эмне үчүн Россия G8ге кайтууга умтулбай турганын түшүндүрдү, ошондой эле атайын аскердик операция — Батыш баштаган согушту токтотууга жасалган аракет экенин билдирди.
Индия менен мамилелер жөнүндө
Путин Индия менен эки тараптуу кызматташуу көптөгөн тармактарда өнүгүп жатканын белгиледи.
Ал дүйнөдөгү өзгөрүүлөр тездик менен жүрүп жатканын, жаңы күч борборлору пайда болуп, дүйнөдөгү күч тең салмактуулугу өзгөрүп жатканын айтты.
«Мындай шартта ири өлкөлөрдүн ортосундагы туруктуулук өтө маанилүү. Бул эки тараптуу да, дүйнөлүк масштабда да алдыга жылууга негиз түзөт», — деди ал.
Президент ошондой эле космостук изилдөөлөр, энергия жана жогорку технологиялар жаатындагы кызматташтыкты эске салды.
«Бизде келечекке багытталган өтө кызыктуу багыттар көп. Мисалы, жасалма интеллект — дүйнөнү көз алдыбызда өзгөртүп жаткан технология», — деди Путин.
АКШ менен Украина боюнча сүйлөшүүлөр
Путиндин айтуусунда, АКШ делегациясы алып келген план Трамп менен Аляскадагы жолугушууга чейин болгон макулдашууларга негизделген.
АКШ сунуштаган документтерди толук көрө элек болгондуктан, ар бир пунктун өзүнчө талкуулоого туура келгенин айтты.
Ал Трамп чын дилден тараптарды консенсуска жеткирүүгө аракет кылып жатканын белгиледи.
Белгилүү пункттар боюнча макул боло алары жөнүндө азыр айтууну Путин «эрте» деп атады, анткени бул сүйлөшүүлөрдүн жүрүшүнө терс таасир этиши мүмкүн.
Украина боюнча
Путин Россиянын Украинадагы аракеттери өз кызыкчылыктарын жана ал жакта жашаган адамдарды коргоого багытталганын айтты.
Ал орус тилине, салттуу баалуулуктарга жана православдык динге басым жасалып жатканын, Украинадагы Орус православ чиркөөсү дээрлик тыюу астында турганын белгиледи.
Путин Батыш 2014-жылдагы төңкөрүштү уюштурууга көмөк көрсөткөнүн, андан кийин Крымда жана Донбасста окуялар башталганын эске салды.
Минск келишимдерин Батыш эч качан аткарууну көздөбөгөнүн айтты.
«Биздин атайын аскердик операция — бул согушту баштоо эмес, аны токтотууга болгон аракет. Батыш украин улутчулдарынын колу менен бизге каршы согуш баштады», — деди Путин.
Россия операция өз максаттарына жеткенде — бул аймактарды толугу менен бошоткондо — аяктай турганын кошумчалады.
G8ге кайтуу жөнүндө
Путин Россия «Чоң сегиздикке» кайтууга умтулбай турганын билдирди.
Ал G7 өлкөлөрү өздөрүн дүйнөлүк лидер деп атаганы күмөндүү экенин айтып, алардын дүйнөлүк экономикадагы үлүшү жыл сайын азайып жатканын айтты.
Германиядагы жана Франциядагы рецессияны мисал келтирди.
«Бир учурдан тартып мен ал жыйындарга барбай да калгам. Бул Украинанын окуяларына байланыштуу эмес», — деди Путин.
Жаңы күч борборлору жөнүндө
Путин Глобалдык Түштүк тез өнүгүп жатканын, айрыкча Индия менен Индонезиянын өсүшү өзгөчө таасирдүү экенин айтты.
Африка да тез өнүгүп жатат жана келечекте бул процесстер мындан да күчөй турганын белгиледи.
Россиянын Азия жана Глобалдык Түштүк менен мамилелерди чыңдоосу жаңы көрүнүш эмес, 2000-жылдардан бери жүрүп келет деди ал.
Путинди адам катары калыптандырган нерселер жөнүндө
Путин өзүн тарбиялаган жагдайлардын ичинен биринчи орунда үй-бүлөсүн, ата-энесин, жакын адамдарын атады.
МККдагы (КГБ) иш тажрыйбасы тартипке жана өлкө кызыкчылыктарын коргоого багытталганын айтты.
СССРдин таркашынан алган сабактар
Путин СССР өзүнүн улуулугуна өтө ишенип алганын, дал ушул ишеним бир катар олуттуу каталарга алып келгенин белгиледи.
«Өлкө канчалык улуу болсо да, туура эмес чечимдер топтолуп, акырында башкарууга мүмкүн болбой калат», — деди ал.
Бул сыяктуу процесстер бүгүн да айрым өлкөлөрдө жүрүп жатканын кошумчалады.
Жасалма интеллект жөнүндө
Путин AI технологиясы жалпысынан адамзаттын жашоосун түп тамырынан өзгөртө турганын айтты.
AI биринчи колдонгон өлкөлөр экономикада, социалдык тармакта, коргонууда, медицинада жана башка бардык тармактарда чоң артыкчылыкка ээ болорун белгиледи.
Бирок жеке маалыматтарды коргоо сыяктуу олуттуу коркунучтарды да атап өттү.
Түбөлүк жашоо жөнүндө
Интервьюнун аягында Путин түбөлүктүүлүк тууралуу суроого жооп берип:
«Баарынын аягы бар. Бир гана Кудай түбөлүктүү», — деди.
Медицинанын өнүгүшү өмүрдү узартууга мүмкүнчүлүк беришин, Индияда жашоо узактыгы 77 жылда 31 жылдан 70 жашка чейин көбөйгөнүн мисал келтирди.
Жасалма интеллект жана гендердик инженерия медицинада колдонулса, натыйжалар мындан да таасирдүү болорун айтты.