Өткөн бир жыл ичинде дүйнөдө күн сайын орточо эсеп менен эки жаңы миллиардер пайда болгон. Мындай жыйынтык жыл сайын жарыяланып келген Hurun Report рейтингинде келтирилип, анда дүйнөнүн эң бай адамдарынын саны рекорддук деңгээлде өскөнү белгиленген.
2026-жылдын 15-январына карата рейтингге 4 020 миллиардер кирген. Бул өткөн жылга салыштырмалуу 578 адамга көп. Бул — баяндаманын 15 жылдык тарыхындагы эң чоң жылдык өсүш. Миллиардерлердин жалпы байлыгы 28%га көбөйгөн. Ошол эле учурда 726 адам бул тизмеге биринчи жолу кирген.
Кытай кайрадан миллиардерлер эң көп жашаган өлкө болуп калды. Бир жыл ичинде алардын саны 287ге көбөйүп, жалпысынан 1 110 миллиардерге жеткен. Экинчи орунда 1 000 миллиардери бар АКШ турат. Үчүнчү орунда 308 миллиардери менен Индия жайгашкан.
Ал эми шаарлар арасында Нью-Йорк дагы эле биринчи орунда — анда 146 миллиардер жашайт. Кытайдын Шэньчжэнь шаары экинчи орунга чыгып, Шанхайды артта калтырды. Бээжин үчүнчү орунду ээледи.
Hurun Research маалыматы боюнча, акыркы жылы байлыктар мурда болуп көрбөгөндөй ылдамдык менен өскөн. Учурдагы тизмедеги адамдардын 70%дан ашыгы он жыл мурун миллиардер эмес болчу.
Эсептөөлөргө ылайык, дүйнөдө күн сайын орточо эсеп менен эки жаңы миллиардер пайда болгон. Ошол эле учурда 96 адам миллиардерлер тизмесинен чыгып калган, бирок бул Hurun байкоолорундагы эң төмөн көрсөткүч болуп саналат.
Дүйнөнүн эң бай адамы ким?
Илон Маск дүйнөдөгү эң бай адам наамын сактап калды. Анын байлыгы 89%га өсүп, болжол менен 792 миллиард долларга жеткен. Бул негизинен SpaceX жана Tesla компанияларынын баалануу наркынын өсүшү менен байланыштуу.
Джефф Безос 300 миллиард доллар байлыгы менен экинчи орунду сактап калды.
Ал эми Ларри Пейдж биринчи жолу алдыңкы үчтүккө кирип, анын байлыгы 271 миллиард долларга жетти.
Кайсы тармактарда миллиардерлер көп?
Акыркы жылдары жасалма интеллект тармагынан чыккан миллиардерлердин саны тездик менен өсүүдө. Маселен, ЖИ инфраструктурасына болгон туруктуу суроо-талаптын аркасында Женсен Хуанг дүйнөдөгү эң бай он адамдын катарына кирди. Анын байлыгы 172 миллиард долларга жеткен.
Мындан тышкары рейтингге жасалма интеллект компанияларынан чыккан 114 адам кирген, алардын 46сы жаңы миллиардерлер болуп саналат.
Докладда ошондой эле миллиардерлердин байлыгынын негизги булагы катары дагы эле каржы кызматтары тармагы кала берери белгиленген. Андан кийин:
- медиа жана көңүл ачуу индустриясы;
- чекене соода;
- эл керектөөчү товарлар тармагы орун алат.
Ал эми акыркы бир жылда эң көп жаңы миллиардерлерди өнөр жай жана саламаттык сактоо тармактары жараткан.
Буга чейин маалымдалгандай, июнь айында дүйнөдөгү эң бай 500 адамдын жалпы байлыгы бир сутканын ичинде рекорддук деңгээлде — 336 миллиард долларга көбөйгөн.