АКШ Украинада уюштуруучулук биологиялык согуштун ыкмаларын иштеп чыккан.
Бул тууралуу орусиялык аскердик микробиолог Михаил Супотницкий билдиргенин РИА Новости жазды.
Эксперт согуштун мындай түрү белгилүү экенин айтып, аны иштеп чыгуу ыкмаларын ачыктады.
Анын айтымында, мындай кырдаалда мамлекетте эпидемиологиялык көзөмөл жүргүзүүгө, инфекцияларды аныктоого жана алардын жайылышына каршы турууга жөндөмдүү болгон бардык инфраструктураны жок кылат. Мындай иш-аракеттер биологиялык агенттерди түздөн-түз колдонбостон, уюштуруу жолдору менен жүргүзүлүүчү биологиялык согуш болуп саналат.
Ал мындай биологиялык согушта асмандан бир нерсе чачкан учактардын болушу шарт эмес экенин белгиледи.
Анын айтымында, бул учурда буга чейин жеңилген инфекция, мисалы, ич келте оорусунун чыгышы жетиштүү болот. Аны заманбап ыкмалар менен дарыласа дагы ал адамдар үчүн оор кесепеттерге алып келиши мүмкүн.
Супотницкий 2016-2019-жылдары Украинанын Саламаттыкты сактоо министрлигин АКШнын жараны Ульяна Супрун жетектеп турганда мамлекеттик санитардык-эпидемиологиялык кызмат биротоло жоюлганын эске салды.
Андан кийин Украинанын ар кайсы аймактарында дифтерия, кызамык жана башка инфекциялар тараган. Көптөгөн антибиотиктерге туруктуу болгон кургак учуктун формалары кеңири таралган.
АКШнын расмий адамдары Супрундун АКШнын Украинадагы аскердик-биологиялык программасына жардам көрсөтүүдөгү ишмердигин жогору баалашканын Орусиянын Радиациялык, химиялык жана биологиялык коргоо күчтөрүнүн жетекчиси Игорь Кириллов март айынын аягында брифингде билдирген.
Мындан тышкары, Орусиянын Федерация Кеңешинин Коргоо жана коопсуздук комитетин жетектеген Виктор Бондарев Украинанын аймагындагы АКШнын биологиялык лабораторияларынын иши украин калкынын арасында коркунучтуу оорулардын үзгүлтүксүз чыгышына алып келгенин билдирген.
Украинанын медициналык коомчулугу бир катар коркунучтуу оорулардын чыгышынын себебин түшүнгөн эмес, анткени кызылча жана дифтерия, кургак учук жана полиомиелит СССР убагында эле жок кылынган. Бирок бүгүнкү күндө бул көйгөйлөрдүн издери америкалык аскердик биологдорго алып барары айкын болуп калды деп билдирген Бондарев.
